New Balance Fresh Foam BB 籃球鞋 | 實戰測試: 避震舒服保護能力強

收到 New Balance 最新嘅籃球鞋 Fresh Foam BB，一聽個名就知呢對鞋嘅主打係 Fresh Foam 避震。如果有著開 New Balance 跑鞋嘅朋友，應該對 Fresh Foam 唔陌生。記憶所及，New Balance 嘅高階籃球鞋例如 Kawhi Lenord 簽名鞋同埋 Two WXY 都係配置 FuelCell 避震，今次應該係 New Balance 第一次將 Fresh Foam 科技放喺籃球鞋上面.

講開 Kawhi，小弟第一次接觸 New Balance 籃球鞋，就係 New Balance 重返籃球市場後簽咗 Kawhi做代言人，而季中轉會嘅 Kawhi 著住對 OMN1S，先絕殺76人，再力壓字母哥， 然後一直殺入總決賽解決埋全盛時期嘅勇士隊。作為速龍隊嘅勝利球迷，小弟當然歡喜若狂，而 Kawhi 腳上非常搶眼嘅OMN1S亦引起我高度注意，最後鼓起勇氣試吓幾十年冇出過籃球鞋嘅 New Balance。

先入為主的家中測試

攞到新鞋但又未有機會去籃球場，當然會身痕著着住喺屋企四圍走，行行企企，扮跳扮射。雖然老婆見到反曬白眼，但係只要你不尷尬…… 喺屋企第一次著上腳嘅感覺係:「嘩! 點解個物料咁硬嘅?」鞋頭幾闊吓，幾啱亞洲人士，高筒嘅設計冇侷促嘅感覺，腳踭附近有特別嘅護墊唔會有腳踭走位情況。而最期待嘅避震絕對有驚喜，比FuelCell 更加容易感覺到嗰種回彈，厚度啱啱好。小弟183cm，180磅， 打中前鋒位置，球場上主要任務都係搶籃板、打內線、間唔中射下中距離，防守嘅時候一係打中間一係打AB位，基本上好少需要高速橫移或者急速轉換方向，呢對鞋絕對俾到我基本嘅需要。

第一次著上腳，感覺良好，唯一擔心係物料較硬，尤其係鞋頭位置一彎曲前掌就有種”un”住嘅腳面嘅感覺，但係經驗俾我知，用合成物料嘅籃球鞋，一般都要時間break in。

實戰測試

著住新鞋打波真的很興奮，作為一個非專業但係非常認真嘅球鞋測試員，寫包膠當然要認真測試。呢段時間著住新鞋打咗大概三個鐘頭嘅友誼賽，一場真正嘅賽事，最後有以下分析：

抓地 (8/10)

好可惜，啱啱呢幾次打波唔知點解都唔係木板地，但係呢對鞋喺啲室內污糟嘅膠地都冇跣嘅感覺，感覺中上。唔建議打室外場，應該磨蝕得好快。

透氣度 (8.5/10)

由於鞋面質地比較薄，就算打完40分鐘比賽都唔會話熱到想即刻除鞋

保護能力 (9/10)

• 高筒設計有一定程度嘅腳踝包圍
• 更重要嘅係前掌比較闊，正所謂腳大好踏穩，前掌穩陣預防拗柴隨時好過高筒設計
• Lateral cage (中文唔知點樣翻譯) 腳尾兩旁高出嚟包住後掌，冇咁易左右翻側
• 隱藏 heel counter 及腳踭附近有特別嘅護墊，腳踭包得很實沒有空隙
• 綁帶設計，每個鞋孔附近有加厚嘅物料，鞋帶綁實咗唔會移位

舒適度 (9/10)

• 之前擔心嘅物料過硬，令到前掌”un”腳嘅憂慮，喺break in之後一掃而空
• 雖然外表嘅合成物料冇咁柔軟但係採用襪套嘅設計，唔會磨擦腳背，感覺舒服
• 鞋墊可以自由替換，方便有扁平足或者需要特別嘅鞋墊人士

重量 (8.5/10)

• 合成質料比較輕
• 腳底嘅 Fresh Foam 感覺比較厚，但係其實唔算重
• 高筒來講成對鞋感覺中間偏輕

避震功能 (9.5/10)

• 避震功能絕對係呢對鞋嘅主打
• 前後腳掌都感受到明顯避震
• 回彈啱啱好，唔會好似踩到舊棉花咁淋
• 但係前掌唔算薄，如果打後衛嘅朋友需要嗰種court feel, 呢對就難啲比到你

尺碼

• 由於鞋頭夠闊，如果你隻腳唔係特別幼長，可以買返一般尺碼甚至細半碼
• 有得試嘅話最好都係喺舖頭試吓

總結

以價錢同性能去比較，呢對鞋絕對係中上之選，避震舒服，保護能力強。其他牌子嘅高筒鞋，成日都係厚底，但為咗偷輕重量，又做到質地薄，後踭承托唔夠，呢對鞋就做到一個好好嘅平衡。如果你打嘅位置係中鋒、大前鋒甚至係經常要跑嘅小前鋒，呢對鞋都係一個好好嘅選擇。如果你係打後衛，成日左右跑，急停轉方向，咁你應該可以有其他嘅選擇。

New Balance Fresh Foam BB 籃球鞋 現已於 New Balance 門市公開發售