上文提要，著慣厚底跑鞋山鞋嘅測試員，著過 Topo 嘅 Terraventure 4 同 MTN Racer 3 後搵返實實在在嘅腳感。今次調返轉，試著 Topo 嘅第一款厚底跑鞋 ATMOS，都非常好奇上腳感覺係點。
交待返 Topo Atmos 基本數據: 與品牌其他鞋款一樣，鞋頭非常之闊，有足夠空間俾腳趾活動；中底採用自家 ZipFoam 物料，加埋非常之厚嘅鞋底，理論上應該彈力同緩震十足；最後就係 5mm 嘅 heel drop (前後跟差) 平易近人，應該唔難適應。
Topo Atmos 定位係舒適路跑鞋，適合日常訓練、恢復跑以及步行及站立，用佢去嚟衝圈，好似又唔太合適，所以今次報告都係以貼地生活角度出發。收到鞋後，小編上手第一個感覺係出奇地輕，雖然中底咁厚，但一啲都無笨重感覺。上腳後再行兩步，發現應該要少少時間開鞋，所以就決定帶埋佢去東京旅行。
----- 廣告 Ad -----
著住Topo睇箱根駅伝
要知道，返鄉下自由行，日行萬步只係濕濕碎，啱晒開鞋及測試舒適度。坦白講，Day 1著足 Atmos 全日，真係需要時間適應，但習慣咗後就會 feel 到舒服位喺邊。厚底鞋如果鞋底太腍，好容易會令人覺得左搖右擺，隨時會失平衡。Topo Atmos 鞋底都是偏軟，但就沒有搖擺感覺，每步都行得安心，相信呢個係同鞋底嘅幾何形狀設計有關。
回港後，先後著過 Topo Atmos 到運動場及街跑訓練，整體感覺係緩震之餘，仍可以感覺到少許路感，呢個係令人驚喜之處。不過有件事要特別一提，因為今次 Atmos 鞋身使用網布鞋面，屬於軟身物料，與大家著開嘅 MTN Racer 等鞋款有明顯分別，保護性一定較弱。個人建議練習前記得正確縛好鞋帶，例如用埋最上方嘅鞋帶孔，咁就唔會出現變形以及影響承托力。
總括而言，如果厚底跑鞋係你杯茶，Topo Atmos 係一對好入門好選擇 (要落場衝成績就要另一對賽鞋)，而且外觀非常有型，練習完行街食嘢都無問題，呢個絕對都係加分位。
