令唔少人高度讚賞嘅電視節目《ERROR自肥企劃》卒之播完,人稱「格仔導演」嘅 Mike導更受歡迎過好多當紅藝員。「格仔導演」喺節目講過鍾意拍攝自然郊野,其實由《美女郊遊遊》至《大海男兒》,佢同埋團隊都發掘咗唔少靚景,令觀眾感受到香港美不勝收嘅一面。15集《ERROR自肥企劃》裏面,大家又睇到咩靚景呢?

死亡行星首次出現: 屯門兆禧苑

第二集《任何人? 友達?》,四位主持人call齊朋友分組玩遊戲。遊戲場地係屯門兆禧苑嘅運動場。呢個位於停車場天台的運動場,有35年歷史,於2020年改建,藍色為主調,計埋地下嘅有蓋運動場,休憩空間達4.5萬呎。

重量級自肥: 鴨脷洲公園

兩次「重量級自肥」環節,為肥仔贏到部 PS5、193贏到部iPad,拍攝場地均為鴨脷公園東北部岸邊,隔離就係鴨脷大橋。第5集工作人員企喺對岸香港仔拎住PS5,第10集企上鴨脷洲大橋拎住ipad。

呢到亦係Mike導經常採用嘅場景,《大海男兒》最後一集,佢哋就由呢到出發,計劃出海睇日出 (最後打風睇唔到)。

團隊大決戰: 賽馬會西貢戶外訓練營

DEE姐深受觀眾讚賞嘅一集,主持人同製作團隊進行體育競賽,拍攝地點係賽馬會西貢戶外訓練營。呢個由香港青年協會營運嘅度假營,位於西貢斬竹灣,主打歷奇同戶外教育,設施頗為完善。

中華白海豚: 東涌對出海面

第10集導演Mike稱係自己嘅自肥環節,搵埋Shirley陳由東涌出發,到對出海面找尋中華白海豚。節目無講佢哋搵咗幾耐,不過熟悉香港生態嘅人士話,今時今日要睇到咁多條海豚一啲都唔容易。

鹹濕荒島俏博士: 煎魚灣

第13集《鹹濕荒島俏博士》主持阿DEE同嘉賓Liz,於「荒島」共度兩日一夜。拍攝地點係南大嶼山郊野公園嘅煎魚灣。

ERROR流忍者: 西貢吊鐘洲

第14集嘅《ERROR流忍者》據講係長篇電視劇嘅預告,片段裏面阿DEE同肥仔沉船被沖上岸嘅海灣,嗰到係西貢吊鐘洲嘅大往灣,呢到可以觀賞西貢另一奇景金魚擺尾同吊鐘洞。

呢個景亦唔係第一次出現喺Mike導嘅節目,《美女郊遊遊》同《大海男兒》都有到訪過呢一處。

ERROR流忍者: 馬鞍山礦場

同樣出現喺《ERROR流忍者》短劇,講述阿DEE同肥仔兩名忍者迷路嘅地方,其實係前馬鞍山礦場。由於附近有馬路汽車可直達,呢到曾經係好多古裝片嘅拍攝場地。

保錡片石: 東涌河

呢處亦係片石專家阿岳嘅主要訓練地點。阿岳於其他訪問透露,東涌河水面平靜,好啱片石,而佢堅持片石嘅石仔,一定係採於當地,以免破壞環境。不過阿岳亦話,不時有人東涌河摸蜆,而摸蜆嘅人竟然覺阿岳阻住佢哋,報警趕阿岳走。

阿DEE求生訓練: 泥涌

阿DEE去「鹹濕荒島」前,於第9集進行過基本嘅求生訓練,訓練地點係烏溪沙泥涌。呢到嘅石灘面積甚大,水退時海星及貝殼類生物暴露於水中,所以成為摸蜆嘅重災區。

香港ERROR遊: 大埔松仔園猛鬼橋

講到香港靚景,唔可以唔講第9集《香港ERROR遊》,當中探靈環節,係去到大埔松仔園嘅「怒水橋」(後稱猛鬼橋,詳細解說可到此)。

至於當集大多數景物都係香港人熟悉,唔使多介紹了。

圖: 節目截圖


文章為作者意見,不代表Fitz立場。
歡迎投稿: http://fitz.hk/contribute/
首頁 > 生活 Life > 《ERROR自肥企劃》10個香港靚景