俄羅斯北部,位於北極圈嘅小鎮 Mys Kamennyy,有村民早前走失咗一隻西摩犬,全村人搵咗幾日都搵唔到。因為剛啱開始冰漂季節,浮冰會離開陸地漂向北冰洋,所以大家都相信狗狗誤闖浮冰,漂流出大海。

狗狗失踪一星期後,一艘石油公司嘅破冰船,竟然喺遼闊嘅冰原上發現狗狗踪影。船上工人停船救狗,仲出動氣墊船將狗狗救出,當時佢身體虛弱,四隻腳仲被冰割傷,好彩狗狗上到船之後得到適當照顧,迅速康復。

更加好彩就係,船上有人知道小鎮 Mys Kamennyy 走失狗消息,佢哋隨即將破冰船駛去小鎮,令狗狗同主人重逢,大團圓結局!

資料: Moscow Times

首頁 > 生活 Life > 俄羅斯西摩犬誤闖浮冰漂流一星期,破冰船奇跡救出重回主人身邊