俄羅斯西摩犬誤闖浮冰漂流一星期，破冰船奇跡救出重回主人身邊

俄羅斯北部，位於北極圈嘅小鎮 Mys Kamennyy，有村民早前走失咗一隻西摩犬，全村人搵咗幾日都搵唔到。因為剛啱開始冰漂季節，浮冰會離開陸地漂向北冰洋，所以大家都相信狗狗誤闖浮冰，漂流出大海。

狗狗失踪一星期後，一艘石油公司嘅破冰船，竟然喺遼闊嘅冰原上發現狗狗踪影。船上工人停船救狗，當時佢身體虛弱，四隻腳仲被冰割傷，好彩狗狗上到船之後得到適當照顧，迅速康復。

更加好彩就係，船上有人知道小鎮 Mys Kamennyy 走失狗消息，佢哋用氣墊船將狗送去小鎮，令狗狗同主人重逢，大團圓結局!

資料: Moscow Times