[唔好做殺手] 摸蜆破壞海洋生態

踏入初夏，各大媒體開始介紹水上活動，而我每次睇到呢一種活動嘅介紹，都會即時反胃，佢就係「摸蜆」。

我反胃，因為成件事絕對係「有破壞無建設」，但啲媒體包裝成個認識生態活動，懶係有教育意義。之但係，對一般香港人嚟講 (唔計嗰啲一次摸十幾廿斤拎去街市賣嘅人)，摸蜆純綷為咗玩，啲蜆拎到返屋企大家係咪真係煮嚟食先？香港近岸啲水質咁差，我就無勇氣食落肚。

摸蜆有幾唔啱？

1. 一隻蜆每日可以過濾200公升海水。摸晒海邊嘅蜆，絕對會令水質變差。水質差嘅話，又會令其他海洋生物減少。
2. 蜆係唔少較大型生物，如魚、鳥類、蟹等，主要食物來源。無晒蜆，其他生物亦會唔夠嘢食而減少。
3. 太多人踐踏泥灘，會踩死埋海星、蟹等生物
4. 摸蜆製造海洋垃圾，污染海洋

有網上群組就發起在海邊派發單張，呼籲大家唔好挖BB蜆。

而最令我反胃，就係摸蜆嘅人，本住「有殺錯無放過」嘅心態，將BB蜆、海星、蟹仔等其他生物一併拎走。其實呢啲生物一離開海洋就會死，又無肉食，真係只為玩樂而殺生，認真作孳！

PS. 據講台灣，以及大多數西方國家，市民去海邊摸蜆都屬違法。當地政府只有發牌畀漁民作有限度挖蜆。

部份資料來源：烏溪沙路Facebook專頁

更多：
Fitz.hk Facebook專頁
蚊滋仔下晝3點前最危險
[唔行無得食] 8大隱世豆腐花
Fitz 生活 Life