英國男子 Nick Carson,多年前被診斷出患上自動釀酒綜合症 (Auto-Brewery Syndrome,簡稱ABS),疾病困擾佢20年,最近佢終有勇氣站出來,向公眾講講佢嘅悲慘經歷。

見到蛋糕會發狂

Nick 上半生於化工廠工作,20年前佢由唔鍾意食甜嘢,突然好鍾意食紙杯蛋糕,仲似係上咗癮咁,無得食就會情緒低落。而食咗蛋糕之後,佢出現飲醉酒嘅後遺症: 亂講嘢、意識模糊,甚至會失去知覺。Nick話:「只要食一件蛋糕,我就會由清醒變為醉酒鬼。」

用咗幾年時間,Nick 同太太卒之搵到名醫,診斷到佢係患咗 ABS。即係話,Nick 嘅胃部就係一個釀酒廠,自動將碳水化合物或醣轉為酒精。

呢十幾年來,Nick 都要隨身帶住酒精呼氣驗測儀器,以免突然「醉倒」,擾騷身邊人甚至發生意外。Nick 仲話,呢個病令佢最大困擾,就係有時喺日頭會「醉」到不醒人事,到醒返覺得超級尷尬,亦好對唔住身邊嘅人。

接觸化學物致病

醫生對於呢個病都無辦法根治,Nick 只能夠控制飲食,食少啲糖食少啲碳水化合物,避免身體裝造酒清。

至於呢個病點解會出現? Nick 估計同之前嘅工作有關,因為佢以前長時間接觸化學物,令身體出現異變。同樣疾病,亦常見於濫用抗生素人士。

Nick 話,佢成日畀人取笑話飲酒唔使錢,但佢反而唔識笑。佢呼籲公眾關心一下呢一類罕見疾病,對病人有番啲同理心。

資料: news.com.au


文章為作者意見,不代表Fitz立場。
歡迎投稿: http://fitz.hk/contribute/
首頁 > 生活 Life > [罕見疾病] 英國男子體內有間釀酒廠 食件蛋糕都會醉