上個月，距離夏威夷1,300公里嘅太平洋「中途島」環礁，信天翁媽媽 Wisdom 成功孵化一隻信天翁BB，令一眾研究人員興奮不已。
信天翁生BB當然唔算罕見，呢次令人興奮，係因為信天翁媽媽 Wisdom 今年已經70歲，相信係世界上已知最長壽雀鳥。此外，專家估計 Wisdom 今年呢胎已經係佢至少第35個BB，同樣係一項成就。
信天翁與研究員的情誼
Wisdom 屬黑背信天翁 (Laysan Albatross)，20年前生物學家普遍認為信天翁只有30歲，不過2002年，美國魚類和野生動物服務局 (USFWS) 專家 Chandler Robbins 發現 Wisdom 嘅腳環，證明當時 Wisdom 已經51歲，完全推翻過去幾十年生物學嘅常識。
Chandler 並且發現，Wisdom 嘅腳環於1953年掛上，而掛腳環嘅研究員，竟然係佢自己。信天翁 Wisdom 同研究員 Chandler，原來喺半世紀前已結下情誼。
可惜嘅係，Chandler 於2017年去世，享年98歲，佢唔可以再次目睹 Wisdom 生兒育女。
信天翁聚居受威脅
Wisdom 之所以咁長壽，某程度上受惠於佢嘅棲息地「中途島」環礁。中途島 (Midway Atoll) 曾經係第二次世界大戰美日交戰嘅戰區。戰爭過後，佢成為生態保育區，有全世界接近四分之三嘅黑腳信天翁，以及20多種鳥類聚居。不過，呢個至關重要嘅棲息地，近年受到氣候變化影響，海平面上升，令棲息地大減。此外，海洋污染 (包括塑膠污染) 令雀鳥受到嚴重威脅；而自2015年開始，該地更有鼠患問題。
Wisdom 嘅故事提醒大家，我哋喺香港棄置一個塑膠袋，破壞緊嘅唔單止係香港環境，仲會污染海洋，以及幾萬公里之外嘅生物。
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。
