各位撫心自問: 大家每日朝九晚六，當中有幾多時間係「扮工」? 幾多係真正「辦工」呢? 西方社會近年不時有研究話，長工時反而降低工作效率，呢次佢哋仲搵埋冰島公務員幫手研究。
冰島首都雷克雅維克 (Reykjavík) 地方議會以及國家公務員，2015年開始進行「每周工作四天」嘅試驗，每周工作由40個鐘減至35至36小時，工資維持不變。多年以來，當局覺得計劃「大獲成功」，員工嘅工作成效不跌反升。地方議會有2000員工，佔全冰島嘅工作人口 1%。
負責監察呢個試驗嘅英國智庫 Autonomy 以及 the Association for Sustainable Democracy (Alda) 發現，員工除咗工作效率大為提升，佢哋嘅身體及心理，亦得到充分休息，生活質素提升。此外，大家返工少咗，亦有助降低碳足跡，符合環保原則。
智庫負責人表示，隨著疫症大流行，封關封城隨處可見，呢個係良好時機去縮短工作時數。最近西班牙政府同新西蘭一間私人機構，已著手推行有關政策，減少員工返工時數。
不過對香港嘅打工仔女嚟講，留喺屋企唔返office，係咪意味住工作時數少咗呢? 腦細嘅「奪命追魂WhatsApp」又點計先?
資料: BBC
講求綠色、環保、天然的健康生活。推廣新一代健康生活文化。
