香港政府於2020年3月發出「居安抗疫手帶」，畀需要隔離檢疫嘅市民使用，以免佢哋喺家居隔離期間四圍走。不過，手帶雖屬「不祥之物」，戴完都唔使立亂棄置啩。
日前喺台灣花蓮，有人就喺七星潭海邊發現一條「居安抗疫手帶」，佢哋搵海洋廢棄物專家鑑證，話手帶係經洋流漂流，由香港去到花蓮，粗略估計至少1000公里，當中重要嘅證據，就係依附喺手帶上面嘅海洋生物。
任何物件喺海上漂浮，都有機會生出唔同海洋生物。專家會根據生物嘅生長情況，評定物件於海上漂流時間。而呢條喺花蓮發現嘅手帶，估計已經喺海上漂流三個幾禮拜。
香港垃圾灣隨處可見
花蓮嘅手帶，令人諗起香港嘅垃圾灣。
香港海岸線極長，唔少海灣都充斥住海洋垃圾。不時有個講法，話香港海洋垃圾都係由內地漂來，最常見就係大陸品牌嘅礦泉水樽，或者簡體字包裝嘅生活廢物。
不過花蓮嘅手帶提醒大家，郊野公園嘅垃圾唔一定外地人所為，海面嘅垃圾亦唔會全部係由大陸漂來。製造污染嘅負任，你同我都係無可推卸。
資料及鳴謝: 海印 Ocean Stamps
講求綠色、環保、天然的健康生活。推廣新一代健康生活文化。
