[康復香港] 做幾多運動 先可提升抵抗力?

康復香港，時代抗疫。

政府寧願封博物館、封圖書館、封運動場，甚至政府寫字樓都封閉，但點都唔封邊境關口。源頭阻截唔到，市民唯有自救，好好鍛鍊身體同疫症決一死戰。

傳統智慧話做運動有助提升身體免疫力，但係唔少做開運動嘅朋友都親身實證，每次跑完馬拉松，或者做完劇烈運動之後，會好容易傷風感冒。咁究竟，做運動係咪一個有效嘅抗疫手段呢?

台灣成功大學醫學院生理學研究所教授任卓穎、陳洵瑛與博士生許觀達，於2011年發表《Severe Exercise and Exercise Training Exert Opposite Effects on Human Neutrophil Apoptosis via Altering the Redox Status》，當時在台灣受到媒體廣泛報道。

提升抵抗力由白血球開始

人體血液中嘅「嗜中性顆粒白血球」(Neutrophil，這裏簡稱「白血球」) 係身體防禦外來疾病嘅第一道防線。呢啲白血球由骨髓製造，白血球壽命越長，骨髓則能有更多時間製造品質較好嘅白血球。

成功大學嘅論文，就用兩年時間，追踪13位自願者嘅運動情況，睇睇佢哋喺劇烈運動之下，白血球嘅死亡情況，從而推斷有關人士嘅抗疫能力。

研究結果顯示，運動與身體抵抗力確實息息相關:

1. 平常唔做運動，突然做劇烈運動，會導致白血球死亡率增加 (白血球死亡提升至40%)。於是就有人話，跑完馬拉松容易患上傷風感冒 (所以做完運動後要好好保暖)。
2. 研究證實，持續做運動，可提升白血球嘅壽命，令抵抗力提升(研究要求自願者每星期做5日運動，兩個月後白血球死亡率由30%下降至10%) 。

所以，要提升身體抵抗力，做運動絕對唔可以「一曝十寒」，定時定候做適量運動，先可以保持身體嘅免疫能力。

論文: Syu, G., Chen, H., & Jen, C. (2011). Severe Exercise and Exercise Training Exert Opposite Effects on Human Neutrophil Apoptosis via Altering the Redox Status PLoS ONE, 6 (9) DOI: 10.1371/journal.pone.0024385

改善生活習慣對抗疫症

要對抗疫症，就要改善生活習慣。就算大家聽過千百次，筆者都要不厭其煩講講:

1. 做適量運動

文章上半部話突然性嘅劇烈運動不可為，咁點為之「合適」運動呢? 用傳統講法，半個鐘輕微出汗，可以邊做邊講嘢嘅運動，就算係合適嘅運動，大人細路都啱。此外，疫症流行時，戶外運動比室內運動更為合適，而且照多啲太陽亦會健康啲。建議嘅運動包括: 行山、緩步跑、慢步、瑜伽等。

2. 充足睡眠

睡眠令身體獲得休息，以整修同恢復免疫功能。缺乏睡眠會令抵抗力大減。

3. 健康飲食

飲食均衡，多吃蔬果，令身體吸收不同營養，以建立身體防禦系統。此外定期補充足夠水份，亦十分重要。

4. 注重個人衛生

出門戴口罩，勤洗手等，已經係香港人日常指定動作了。

資料: 泛科學、 Ask the Scientists