Fitz > 生活 Life > [按摩槍使用指南] 有效喚醒及放鬆肌肉 小心誤用致受傷

運動裝備日新月異,呢兩年突然跑出嘅「肌肉按摩槍」(Fascia Gun / Massage Gun),已成為唔少人嘅重要裝備。按摩槍以物理撞擊方式,達致放鬆肌肉效果,而且通常配有唔同形狀及硬度配件,方便自己動手按摩。

華盛頓郵報》早前就訪問各方專家,探討呢種時下十分流行嘅運動裝備,使用上有咩要注意。

按摩槍功效

按摩槍採用敲擊療法和振動療法,撞擊淋巴或靜脈血等位置嘅細胞,以減輕炎症及加強血液循環,幫助放鬆緊繃嘅肌肉,減少肌肉酸痛,甚至預防 DOMS (延遲性肌肉酸痛)。有研究指,按摩槍與人手按摩同樣有效。

此外喺運動前,使用按摩槍亦可喚醒肌肉,提升熱身功效,避免肌肉受傷。

使用技巧

  • 使用按摩槍,先要保持肌肉於放鬆狀態
  • 一開始先以最低檔位,慢慢為肌肉按摩。並且保持緩慢嘅移動速度,由肌肉淺層往深層慢慢按摩
  • 最初可選擇體積較大嘅肌肉 (如大腿、臀部)
  • 如有剌痛感覺,或皮膚出現瘀紅,可能係用力過度,需停止使用
唔好立亂為頸部按摩

誤用會受傷

錯誤使用按摩槍,可能會令自己受傷,使用前必須要留意以下幾點:

  1. 叫人幫手用按摩槍為自己按摩,對方往往會用力過度,相反自行使用,又會因為驚受傷而唔夠力,功能大減。
  2. 唔好長時間按摩同一部位,皮膚見紅,就要移去另一個部位,以免撞瘀
  3. 身體好多地方唔適合使用按摩槍,例如神經密集部位 (如腳底)、骨骼、關節,都唔好用按摩槍撞擊
  4. 永遠唔好為頸部按摩,頸部涉及主動脈、頸柱及空管,一整傷就手尾長
  5. 患有神經病變 (常見於長者及糖尿病人) 唔好用按摩槍。因為呢啲病人對疼痛感覺遲緩,受傷都未必知
  6. 長期食藥 (例如阿士匹靈) 亦唔好用,某些藥物會令血液變稀,容易內出血。
叫人幫手用按摩槍按摩,好易會用力過度

選購按摩槍

按摩槍售價由幾百至幾千不等,功能、配件多少,視乎大家需要。大致來講,有幾個原則可以留意:

  • 越靜越好: 按摩槍太嘈,較易令人使用過大力度,唔安全
  • 越輕越好: 裝置越輕,容易控制力度及位置,使用更得心應手
  • 大小視乎個人: 無話大支定細支好,只要適合自己手型,就係一支適合你嘅按摩槍
某些按摩槍會送一堆槍頭,多到用唔晒。

專家仲話,按摩槍某程度上係醫療用具,如果諗住長期使用,不妨先多了解身體結構,令按摩更有功效之餘,亦可避免受傷。

資料: Washington PostEsquire hk


文章為作者意見,不代表Fitz立場。