暑熱警告下的日常生活 | 將飲水變成習慣

政府推出「暑熱警告指引」，以防打工仔工作時中暑。未到端午節，勞工處已經要發出第一個黃色警告，部份工人喺警報之下有機會稍事休息。無論工作或戶外活動，要散熱降溫，補水非常重要，身體水份能夠有效調節體溫，飲得其法，就可以達到最大效能。

日常飲水四大法門

1. 飲水時機

口渴時要飲水，但唔口渴嘅時候更加要飲水。平時要有定時飲水習慣，以令身體維持充足水份。英國官方醫療機構 NHS 提醒國民，要以「搵朋友飲茶」的態度 (make drinking a social thing, like “having a cup of tea”) 去鼓勵自己及身邊人飲水。

2. 冰水可降溫?

理論上，冰凍飲料飲咗落肚，可以令身體降溫。不過一口氣飲太多太凍嘅飲品，容易令身體唔能夠一下子適應 (例如令氣管收縮)。想補充水份，其實室溫水已經好適合。

3. 清水最好

飲咖啡飲奶茶飲汽水飲例湯飲牛奶，當然可以補充水份，不過唔同飲料都有唔同缺點，例如茶同咖啡含有咖啡因，誘導身體排尿，反而排出更多水份；果汁、汽水含糖，糖會影響身體吸收水分，所以最好的還是飲用清水。

4. 每日8杯水?

傳統講法話每日要飲8杯水，或者每日飲水2公升，不過近年呢啲講法已經被推翻，因為飲幾多水其實因人或環境而異。運動員飲8杯水一定唔夠，天氣寒冷亦未必需要飲太多水，所以目前被公認嘅講法，就係飲水時機，最緊要養成定時飲水習慣，唔一定要限定飲幾多水，總之覺得夠就得。

資料: NHS、Mayo Clinic