Fitz > 生活 Life > [樂施會.西城計] 意想不到的西環解謎之旅

呢個暑假,我哋喺樂施會實習,本身以為一直都只係做 office work,點知第二日就有得玩《西城計:看不見的存在》。職員姐姐同我哋講,呢個係樂施會自己創作嘅戶外實境解謎遊戲,俾玩家透過觀察同解謎,深刻體驗隱藏在社區中嘅貧窮實況。聽到嗰下,我哋都覺得好新穎,冇諗過 NGO 都可以咁有創意,而且「實境解謎」聽落去都好吸引呢!

開箱啦!

第二日,我哋檢查好遊戲盒道具、download 咗遊戲 app 之後,就同另外兩位朋友喺西營盤地鐵站集合。《西城計》故事有五個遊戲角色,佢哋性格各異,關心嘅事物可以話係大相徑庭。一開始我哋要揀好各自想扮演嘅角色,全部確認後就可以開始遊戲啦!

遊戲 app 界面

《西城計》係「實境解謎」遊戲,玩法類似密室逃脫同 city hunt 嘅混合版。我哋要跟住遊戲 app 指示到達 checkpoint ,然後透過觀察四周景物,配合遊戲盒道具破解題目,先可以解鎖下一個地點。

到咗 checkpoint,就可以拆下個道具啦!

身為遊戲菜鳥嘅我哋,齋揾 checkpoint 都花咗唔少時間,但期間都加深咗我哋對西環嘅了解。一直以嚟,我哋對西環嘅印象都圍繞住高級住宅區、打卡熱點。但玩過先知,原來西環嘅靚樓旁邊就挨住舊樓,沿途亦有唔少特色店鋪。

探索社區中~

講番個遊戲劇情,我哋最深刻嘅角色係 Gini,佢全程都淨係想打卡,又以「女神」自稱,係一個名副其實嘅「港女」。路過垃圾站,或者見到執紙皮嘅婆婆,Gini 都會滿口嫌棄。本身我哋以爲佢只係貪靚、怕污糟,但慢慢睇到多啲由 Gini 提出針對貧窮人嘅批評,我哋意會到,當中存在唔少對窮人嘅迷思,甚至偏見。呢啲劇情令我哋有好多反思:喺日常生活,我哋係點看待弱勢社群? 貧窮背後又有咩原因,甚或係深層次嘅社會問題呢?

如果唔係《西城計》,我哋唔會知原來高檔嘅西環,有住不爲人知嘅另一面。

呢次《西城計》體驗之旅,有刺激解謎嘅時刻,亦都有輕鬆逗貓嘅時刻。我哋都估唔到半日時間過得休閒之餘,仲可以咁有意義!如果大家 weekend 唔知玩咩好,不妨試下《西城計》,嚟一次別具特色嘅香港深度遊。

好精靈嘅貓咪

文章為作者意見,不代表Fitz立場。