澳門「觀音像海濱休憩區」最近啟用，佢係澳門少有嘅大型公眾遊樂設施，位於文化中心同科學館附近海濱。公園佔地1.5萬平方米，設施眾多，計有:
- 海濱步行徑長約400米
- 兒童遊樂區總面積約2,700平方米
- 茶座區設有新穎遮陽造型茶座、小賣亭、親子廁所及哺乳室
- 健身康樂區包括門球場、滾軸溜冰場及多功能球場
整個休憩區興建費用約5000萬澳門元，用咗208日完成。比起香港觀塘嘅音樂噴泉，大家同樣用咗5000萬公帑，澳門呢個設施，無論計可使用面積、用途、施工期，以至損壞情況，都可以完勝香港。
「古惑的球場」
不過，「觀音像海濱休憩區」入面嘅「多功能球場」，安排就備受市民批評。原來，球場設計將籃球場同足球場二合為一，一個球場有兩個用途。咁市民幾時可以打籃球，幾時可以踢足球呢? 球場嘅安排就採用「梅花間竹」嘅方法，一個鐘打籃球，一個鐘踢足球。
《澳門力報》訪問球場波友，話一個鐘打場波「時間只係啱啱夠」，多幾個人到場打未必夠喉。而且輪流交替足球籃球，好可能造成混亂。
其實，將足球籃球撈埋喺一個球場，呢個構思相當破格。而「梅花間竹」呢個安排，更令人諗起阿漆嗰支「古惑的槍」，梅花間竹向前射向後射，相當有喜感。
講幽默感呢方面，澳門又勝香港一仗。
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。
