6月12日，丹麥足球員艾歷臣於賽事中途突然倒地不起，事後公佈佢心臟突然停止跳動，好彩搶救及時，據報而家已脫離危險期，情況穩定。
6月14日，印尼羽毛球男雙名將基度 (Markis Kido) 於練波時急性心臟病發，經搶救後去世，終年36歲。
上述兩位都係當打嘅職業運動員，體能狀態應該無大問題，佢哋嘅經歷提醒大家，我哋要關注心臟健康。雖然心臟病未必有先兆，不過進行跑步、行山等戶外活動時，仍可以留意自己身體情況，防患於未然。
4招減輕心臟負荷
1. 運動時留意身體狀況
進行劇烈運動前要有充足熱身，循序漸進唔好一下谷得太盡。運動時如果發現身體有不良情況，如噁心、頭暈、左手麻痺等，應停止運動。
2. 及時補水
身體缺水可導致血液變稠，降低血液流量，引發高血壓，甚至形成血栓。運動期間要定時補水，運動後亦要飲水，切記唔可以一次飲太多，採取少量多補做法。
3. 注意睡眠
缺乏睡眠下進行劇烈運動，會加重心臟負擔，所以做運動前要有充足睡眠。睡眠不足下，最好減輕運動量。
4. 身體檢查
家族有心臟病史，以及年過35歲，有必要定期進行身體檢查，了解心臟病嘅風險。如果係心臟病高危人士，進行劇烈運動前，應先徵詢醫生意見。
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。
