政府防疫新招，戶外都要戴口罩，唔戴就要拉! 一下子，運動口罩需求大增，咁究竟所謂嘅「運動口罩」又有咩規格呢?
歐美的 breathable face masks
早前歐美多國都實施「禁足令」，但唔少國家容許國民出街做運動，甚至無強制佢哋戴口罩，不過唔少著名戶外裝備品牌，都相繼推出運動類型口罩。要注意嘅係，就算喺香港買到相關產品 (美國仍然禁止防疫用品出口)，呢啲口罩亦未必達到防疫需求。
歐洲及美國同類產品，好多時都係:
- 不阻礙運動時呼吸，佢哋統稱為 breathable face masks
- 大部份可重用
- 未必有防菌防病毒驗證 (如BFE，PFE，VFE，MPPS 等級別)
化學博士鄺士山: 口罩講求保護性
港大化學博士鄺士山 (K Kwong)，疫情爆發之後成為本地口罩專家，佢接受記者採訪時話:
「口罩無分是否運動口罩，建議運動時使用保護性能強且透氣度高的納米 (nano) 口罩，國際標準是壓差需低於 5mm H2O/cm2。」
「點解要成日強調納米，因為運動時會出汗，納米係唔怕汗，濕咗都用得，冇影響 (防疫)」
即係話，口罩過濾芯片要有納米級別，就可以做到不防礙呼吸，又能阻檔細菌病毒，更不怕汗水整濕口罩。
事實上，戴口罩係為咗防止吸入外來病毒，以及避免將飛沫散播，所以就算係運動口罩，都唔應該忽視佢嘅保護性。
戴口罩做運動勿逞強
做運動要戴口罩，除咗口罩嘅質量，亦要留意以下幾件事:
- 避免因汗水整濕口罩而影響口罩防疫功能，除咗可揀選具有防水功能嘅口罩，亦可以加入口罩支架嘅裝備，據講可以令呼吸較暢順
- 無論口罩點樣透氣點樣高質量，唔多唔少都借影響呼吸。萬一做運動時發現呼吸困難，甚至身體不適，必須立即停止運動，除底口罩休息 (早前有大陸學生懷疑因為戴口罩而喪命)
- 專家指戴口罩運動就好似高原訓練，應該要相應減低訓練量，例如跑慢啲等，以免發生意外
- 外科手術口罩萬一濕咗，或有任何破損，都唔應該再用
- 口罩只係防疫其中一道防線，大家仲要做好個人衛生
其實，疫情大爆發之下，為免散播病毒，都係多啲留喺屋企啦。
講求綠色、環保、天然的健康生活。推廣新一代健康生活文化。
