Fitz > 生活 Life > 保育 Conservation > 從《緣路山旮旯》說起: 香港唔係只得鬧市
利申: 呢篇唔係影評,無劇透。筆者仲未睇,想透都無得透。

最近財政司司長陳茂波重提發展郊野公園邊陲地帶,有立法會議員附和,挖土機怪手伸入香港郊野嘅威脅,實在令人擔憂。香港嘅郊野地區,並唔係只有山有水有樹有野豬有馬騮,仲有唔少香港人定居。郊外環境,實在唔可以話變就變。

今年暑假檔期電影《緣路山旮旯》,表面上喺一套由「唔靚仔」嘅男主角 (岑珈其自稱),配上五名靚女主角 (蘇麗珊、張紋嘉、陳漢娜、梁雍婷、余香凝) 一套愛情小品。不過,故事圍繞香港五處「山旮旯」之村落 (沙頭角、下白泥、荔枝窩、大澳、大嶼山澄碧村),都係唔少香港人都未踏足過嘅地方,令大家從另一個角度感受到香港嘅美麗。據講,電影討論會時有觀眾直言:「我都唔知原來香港咁大」,更有觀眾話睇完戲好有衝動去晒呢啲地方。

至於戲女主角點解會住到咁偏僻,以及佢哋嘅「農村」生活 (有部份係根據真人真事改篇) ,大家就要入場睇嘞。

喺香港生活多年嘅台灣文學家劉克襄,佢嘅名作《四分之三的香港: 行山.穿村.遇見風水林》,點出香港有四分之三的土地,皆為自然郊區。喺劉先生心目中,香港最引人入勝之處,並唔係銅鑼灣嘅繁華或中環嘅摩天大廈,而係香港郊野以及偏遠村落嘅環境與人和事。

如果睇完呢段文字,大家肯入場支持港產片,筆者固然高興。但更加希望就係,大家要記住每個人都有自己喜愛嘅生活方式,我哋應該尊重同包容,唔係「發展」兩字可以抹煞。


文章為作者意見,不代表Fitz立場。
歡迎投稿: http://fitz.hk/contribute/