看到膀頭同背脊甩皮，心中、腦海仍被振盪著回味著。
沖繩環島跑，成就了我的夢想，讓孩子飛得更高更遠。
我深信，沒有事是不可能。只視乎你有幾堅定，只視乎你有幾投入。
我深信，與孩子同行，他們能感受更深。
我深信，讓孩子有成功的經歷，會令他們飛得更遠更高。

有一天，在面書上看到宗宗的環島體驗，心中很羨慕，年青多好。
心中一直盤旋著環島、環島、環島……我都想，我可以嗎? 如果帶著一班長跑隊員環島跑，又可以嗎?

又有一天，我如常帶領同學練習，心中無聊地想，如果我可以在他們畢業前，讓他們有多一點的經歷，帶住這班寶寶，試一次環島，讓他們爆一次、勁一次、型一次，多好。開始為這看似不可能的夢想，開始去發……夢。在這幾年長跑隊在努力經營下，成績一點一點的進步，得到校方的支持。所以當我將這想法向校長提出時，他一口便贊成。接下來的公式文件程序，更到到同事的協助，這樣便正式向環島之旅踏出第一步。

西貢崇真 2019沖繩環島

經過大半年的籌劃，終於在5月10日便開始踏上沖繩環島之旅。在旅程前除了要為同學編定訓練外，更重要的，是要向他們灌輸、教導他們這次旅程應抱的心態、態度、難度等等。

在訓練環節，除要使他們有足夠能力應付每天30多公里的路程外，又要顧及路線的趣味性，學校北潭涌來回、天星碼頭去藍田、學校上科大來回、沙田去科學園來回……現回想就是處理練習，對我自己都已經是……夢。一對其怪的腳型，跑親10K樓上都總係瘀腳趾起水泡、最多報過10k比賽、同長跑根本唔係朋友，但心想，這正是我自己學習堅持、堅毅的機會，與他們同行，除感覺美好外，我想亦是身教吧!

7日6夜，對我而言，其實所需要既勇氣、意志都比他們大，除個人難，帶住18個學生進行都算高高地難度既活動，都咪話唔大挑戰大壓力。好彩有林sir同行啫。

這7日6夜過程唔辛苦無難度…… 就假既，賬面睇咁多日先跑150K，行都行到啦，算咩創舉算咩大事。

但實情係暴曬既天氣，完全消磨意志；落完雨又再出大大太陽，似喺蒸籠裡行走；連續上斜，無論大斜暗斜，上極唔完，簡直灰到盡頭；望住地圖跑錯路，跑左入農田山邊，那迷失感氣餒感，令心中不安；在少年不知死，話左要均速但唔聽，第一日就chur爆，又或有舊傷等等，都令看似唔太難既150K添上無限阻礙。

有隊員因身體出現狀況及舊患，要「被」上車，我做這決定，心中很矛盾亦很難受，但我就是要狠心，完夢重要，但安全齊整更重要。

有隊員心態不正確，有能力但hea跑，我盤旋著點先可以改變佢既心態? 我俾佢嚟係咪錯既決定? 點先可以令佢改變根深蒂固既自私功利信念，我心中一沉。

有隊員跑左1、2日開始腳痛，腳板痛、肌肉痛、膝頭痛，五花八門。但見佢地夜晚會搵宗宗大夫醫治，第二日又繼續小宇宙爆發，就算係痛，都跛住跑，看在心裡，是甜是美好。

有隊員由一開始就對自己無信心，驚自己跟唔到驚自己跑唔晒，實情係拍完佢膀頭讚完佢勁，佢就真係超越自己，越跑越勇。

有隊員由始至終都正面積極，認真投入，每日最尾個程都谷到爆，喊住跑，明知跟唔到大隊開始落後都死命要完成，見到隊友腳痛到跑唔到，就抬住一齊返，多美好。

最後1日路程，各人正常都應該開始出現疲累狀態，但出乎意料，人人都像上左電，越跑越有，而且更被教練儲爺、林sir、宗宗sir既言行挑戰，促成跑左140K後都顛到3分尾4分頭跑1公里，小伙子果然精力無限。

終於，走到最後2公里，22人一齊開始，亦要22人一齊完結，這同步同行同心既共同感，是我很想他們體會，只有同行才會對大家感受更深。

一齊由起點出發，5日後又回到同一地方終結，由校歌開始，由校歌完結。那一刻，看到他互相擁抱、擊掌、激動流淚，我心中很激動、安慰、亦舒了一口氣，完成了。終於能帶著我18個可愛的孩子完了我們的夢了。走遠了、看多了。

孩子們，正如我所講，環島的完結就是你們的新開始，你們能將這看似不可能都變成可能，你們記緊要將當中經歷、所學、所得、所感，把它在日常生活處事學習中應用，當遇到困難、挫折或想放棄時，就將這次的經歷拿出來細味。前路就像我們跑過的路，有康莊大道、有坡折陡峭的小路、有無限上斜亦有落坡，起起跌跌，有時身邊有同伴有教練有老師扶你一把為你打氣，有時你要獨個兒的碰碰撞撞，但不用怕不要退縮不要擔心，即使走多了、走歪了，到最後，你們都能安好到達終點，只要你們能堅持不放棄就一定可以。

沖繩環島，讓夢飛翔。
有夢、追夢、尋夢、讓孩子飛得高看得遠。很美好。

在此，實在要十分、超級感謝……

宗宗sir，十分正面積極陽光大男孩，其實認識很短日子，但真給他追求理想的那團火所吸引。我只輕輕提及，他便想也不想就答OK呀! 無問題! 就係咁，得他仗義幫忙，成就了這次環島，由行程、路線、景點、住宿各樣安排，都由他為我們籌劃。我想沒有他，我估我都應該、可能、或者可以攪得掂，不過應該係唔知要延遲幾多年先成到事。再者，喺呢7日6夜，除帶領同學外，每晚嘅夜診服務，我估不單係協助處理同學傷患，最重要係心靈上既安慰。

儲爺，我校長跑主教練，呢2年，一直協助我處理長跑校隊訓練，成績的進步，他功不可沒。儲爺踏實溫文行童顏靚仔路線，從不多言，看似無所謂但極有自己深度，一係唔講野，一講都中point到位。全個旅程用自己去燃點同學，陪住打氣、用加速、用「隊」的方法去提升同學速度同事氣。

林sir，我的拍擋，拋妻棄子同我一齊顛。由預備練習到全個環島，他都為我包晒所有執漏，令我無後顧之憂，我有困難有疑惑，問親都總是支持，呢啲 partner 邊度搵呀! 全程同我互相補位，唔洗多講一個眼神就心領神會。除左多謝，就係感謝。

我的2個寶貝女兒，我身為一個十分非常稱職既媽媽，居然唔湊自己呀女而出走7日同人地仔女顛，獨留而、彤在家，但她們無時無刻都只會支持支持同支持。

我的18個寶貝，這不單是你們的夢，也是我的夢。有夢、便能飛，要學會争氣不可放棄，夢便成真。

最後，我要感謝一個年紀唔細仲去顛既自己，雖然係體育老師，但係籃球、手球出身，最多都係呢幾年陪下學生跑下10K，150K距離加曬到一身朱古力咁既膚色，今次擺明玩命。

興幸自己仲有一團火，希望這團火能繼續互燃，不單是我燒佢地，係希望佢地會繼續燒我同燒埋d師弟妹。

Thx for Flying me to the moon

撰文: 體育Miss 徐大頭

Fitz連結: https://fitz.hk/?p=119915