Fitz > 生活 Life > 本地遊 Local > 西沙路近水浪窩安裝泊車咪錶,單次最多泊四小時

2022年年中北潭涌停車場安裝泊車咪錶後,近日有人發現西貢多處亦增設停車咪錶。咁會唔會易泊咗? 要過一段時間先知。

Facebook群組 全港違例抄牌提示區 有成員發帖,話西沙公路近大網仔一段路邊車位,以及大網仔路部份停車位,都安裝咗新式泊車咪錶。即係由原本免費泊車,變為每15分鐘2蚊。配合「入錶易」App 遙距入錶,最長可以泊四小時,唔入錶被抄牌就要罰320蚊。

四個鐘夠唔夠大家去BBQ、露營、行山,就真係閣下自理。不過燒烤場同營地仍然封閉,相信對呢批市民影響不大。更何況,就算安裝咪錶,但仍然泊滿行車證過期、鋪滿沙塵嘅死車。政府一日唔處理呢啲死車,就算有咪位都係無用。

要注意嘅係,行山露營BBQ呢啲戶外活動,最好避免揸車。私家車會製造空氣污染,又會堵塞交通,可以的話,都係盡量乘搭公共交通工具去起點。


文章為作者意見,不代表Fitz立場。
歡迎投稿: http://fitz.hk/contribute/