大圍明渠變身河道花園，冬日限定有滅頂風險

政府早幾年提出「河畔城市」概念 ，話要活化幾條市民稱為坑渠嘅「河道」，包括大圍一段城門河、大埔河，以及俗稱為「雞寮大坑渠」嘅觀塘翠屏河。本月開始，「大圍明渠」率先活化，日前更開放試用。

大圍明渠活化計劃原訂預計於2024年動工，但渠務署興建咗臨時河道花園作示範，臨時設施包括休閒座位、人造草地、3D地畫及兒童康樂設施。

大圍明渠臨時河道已經開放，《獨立媒體》到場視察，並訪問當區街坊。街坊指，河道水質並沒有改善，仍不時傳出臭味。到場記者亦發現，用以阻隔垃圾嘅鐵絲網並無好好清理，有臭味傳出。

大圍明渠臨時公園現時係「冬日限定試用」，試用期至2月底。原因係雨季開始後，上游嘅下城門水塘有排洪可能，排洪會令呢段河道水浸。有區議員認為呢個活化工程係浪費公帑，河道嘅設施有可能會因為排洪而「壯烈犠牲」。

當然，如果計劃成功，咁市民確實多咗休憩空間。不過「美食車」嘅結局令市民記憶猶新，有唔少市民都抱持悲觀態度。