----- 廣告 Ad -----
10月12日河南省鄭州市有5名市民，相約揸車去黃河邊露營，佢哋玩咗三日後，10月14日入城，但發現鄭州疫情嚴峻，各個通道被鐵板圍封。原來，當地政府實施「不進不出」措施，加上佢哋未符合24小時核酸檢測要求，所以決定原車返黃河邊繼續露營，結果住咗22日先返到屋企。
其中一名「生還者」劉琦 (化名)，喺11月2日返到屋企之後，即刻寫咗篇文講返呢22日嘅經歷，佢哋遇到嘅問題有:
----- 廣告 Ad -----
1. 缺水缺糧
佢哋身上嘅糧食去到第7日已經差唔多耗盡，要實施配給制，每日食兩餐。食水方面，附近並無乾淨水源，原本佢哋想過濾黃河水飲用，點知黃河太多沙泥，濾芯都整壞幾個。
好彩佢七日後搵到附近有農田，「借」人哋嘅農作物，以及去農田取水，解決燃眉之急。
2. 天氣寒冷
露宿幾日後天氣突變，氣溫急降，間中仲有大雨，佢哋靠帳幕同睡袋都頂唔住，諗住斬樹燒火但因為風太大，取唔到暖。頂咗十日八日之後，有人採用新疆少數民數嘅挖地坑方法，大家匿入地坑取暖。
3. 情緒低落
每日為咗求生、搵糧食、挖地坑、斬柴燒火，已經搞到筋疲力盡。而喺最初糧食短缺嘅時間，有人情緒極之低落，好驚會葬身荒野。
----- 廣告 Ad -----
可喜嘅係，佢哋拎咗個太陽能發電裝置，可以幫手機充電。仲可以喺上網發佈消息，引來唔少網民關注。卒之喺第15日，農田主人喺網上留意到佢哋，主動提供糧食，佢哋先叫做解除生命威脅。11月鄭州解封，一行人喺11月2日返到屋企。
最後報告係，呢班人喺荒野捱咗22日，大家瘦咗一個碼，有人仲瘦咗廿幾磅㖭。
資料: 新浪網
