Fitz > 新聞 News > COLLAR巴士巡遊 兩學生徒步跟足5公里 | 尖沙咀至旺角再跑到西九

COLLAR 出道一周年,搞咗個開篷巴士巡遊,大批「領粉」當然到場支持,而最出位就數到 Tommy 同 Hugo。

呢兩位15歲學生,一直跟住部巴士,由尖沙咀跑去旺角,再由旺角跑去西九文化區,全程約5公里。

Tommy 同 Hugo 話,佢哋唔係成日跑步,只不過最初見到部巴士唔行得咁快就試下追,點知跑下跑下就跑足全程,自己都無諗過咁勁。

「我哋之前一日學校陸運會,我哋都參加咗3000米長跑,而家好攰好攰,對腳好似唔屬於自己。」

雖然咁攰,佢哋不約而同表示絕對值得,仲話「好似追女仔咁,唔可以一時三刻,要付出過先珍惜。」

資料: COLLAR後援會


文章為作者意見,不代表Fitz立場。
歡迎投稿: http://fitz.hk/contribute/