由德國起家、近年喺全球爆紅嘅健身競賽品牌 Hyrox，正式成為 LVMH 集團成員之一，市場估值約6億歐元 (約51億港元)。
Hyrox 由 Christian Toetzke 同 Moritz Fürste 兩位德國創辦人喺 2017年 創立，概念係將8公里跑步同8個功能性訓練站結合，打造一個「人人可參與」嘅健身競賽。 賽事喺歐洲快速擴張，2019年吸引中國企業萬達體育旗下的 Infront Sports & Media 首次投資，幫助 Hyrox 進軍北美、亞洲同中東市場。
Hyrox 兩位創辦人
點解萬達要賣? 市場認為，Infront 近年專注於 頂級體育 IP (例如 FIFA 世界盃、冬奧、環法單車賽等)，而 HYROX 雖然增長快速，但本質上係「大眾參與型」賽事，同 Infront 嘅核心業務策略有落差。 加上 HYROX 創辦人一直希望重新掌握品牌主導權，雙方喺 2026年9月達成協議，由 L Catterton 領頭財團收購 Infront 手上多數股權。交易金額方面，雖然官方未公開披露，但多份財經媒體引述消息人士指，估值約6億歐元。
L Catterton 係 LVMH 集團旗下嘅消費品私募投資公司，由 LVMH 家族控制，專注投資全球高端消費品牌。 LVMH 集團旗下包括 Louis Vuitton、Dior、Fendi、Celine、Bulgari、Tiffany & Co.、Moët & Chandon 等超過75個高端品牌，涵蓋時裝、皮具、珠寶、腕錶、香水、化妝品、葡萄酒同烈酒等領域。
L Catterton 過往嘅投資組合包括 Lululemon、Glossier、Birkenstock、J.Crew、Equinox 等消費品牌，擅長將品牌包裝成「可負擔嘅奢華」或「高端生活方式」。近年 LVMH 成為 F1 賽事最大贊助商，將高端消費與體育連結。如今 HYROX 成為 LVMH 一員，有可能令 HYROX 形象提升。
近年 LVMH 贊助 F1賽車
HYROX 成「高端潮流」?
HYROX 而家嘅定位係「人人可參與嘅健身競賽」—— 唔係精英運動員先可以參加，而係普通人都可以挑戰自己。 但一旦進入 LVMH 生態，市場自然會問：呢項運動會唔會變成「高端潮流」?
從正面角度睇，LVMH 系資源可以幫助 HYROX 加速全球化擴張，尤其喺 亞洲、中東 等新興市場。憑 LVMH 的包裝經驗，可幫助 HYROX 提升 媒體曝光、贊助商結構、賽事體驗。 例如，HYROX有可能推出限量版服裝、鞋款、配件，甚至同 LVMH 旗下品牌做跨界聯乘，好似 Lululemon 同高端設計師合作咁。
但另一方面，過度高端化亦可能帶來風險。如果報名費大幅上升，或者賽事焦點由「參與」變為「表演」，HYROX 可能失去而家嘅核心吸引力 —— 「人人可參與」嘅社群文化。點樣平衡各方利益，將成新東家嘅最大挑戰。
