屋企夠大當然可以跑步,但要留意會唔會嘈到啲街坊

病毒威脅之下,小心翼翼是常識吧。而喺疫情爆發、部份物資短缺、生活壓力前所未有咁大之下,市民關係充滿張力,有時難免引起對立。

發帖嘅「荃灣友」指出,荃灣海濱公園近有線電視對出行人路,朝早時候會塞滿趕返工嘅人。有唔少人喺呢個時候跑步,喺人潮中穿插。疫症期間跑步人士唔戴口罩,令人有傳播病毒嘅疑慮。

利申: 疫症期間,筆者亦經常跑街,跑步時亦不戴口罩 (跑前跑後會戴)。站在一般唔跑步嘅市民立場,若有人唔戴口罩迎面跑過來,其實都幾驚嚇,所以上面呢個帖真係駁唔到。

跑街講公德

  1. 出行前研究路線,盡量揀啲無咁多人嘅街道
  2. 見到迎面有一大班人,不如兜一兜路避開下先
  3. 可準備面巾之類嘅裝備,必要時遮一遮口鼻
  4. 盡量喺清晨或晚上較少行人嘅時候跑步

家居運動避免擾民

近排西方國家都實施家居隔離,唔少人被逼留喺屋企,所以會出現「露台跑全馬」、「客廳跑60K」嘅短片。不過,香港嘅樓宇結構同外國唔同,有人就因為樓上做運動,而搞到好困擾!

都係嗰句,同理心好緊要,喺對方嘅角度諗返轉頭,就可以避免好多不必要衝突。

家居噪音受《噪音管制條例》(第400章) 所規限。依照法例,晚上11時至翌日早上7時,若住用處所或公眾地方發出令人煩擾嘅噪音,就可由警察代為執法,控檢發出噪音人士。至於點為之「噪音」呢?

喺呢條法例之下,無需以器械測量,只需根據執法者 (即係警察) 嘅觀察,覺得「嘈到人」、造成滋擾就得。

當然,搞到樓下打999搵警察上門就點都好唔好啦。最好大家喺屋企做運動之前,做好預防措施先。

家居運動講公德

  1. 盡量揀日頭做運動,雖然話法例係11點後先叫噪音,但都唔好9點幾10點嘈到人
  2. 如果知道自己嘅單位應聲,就減少做跳躍嘅運動 (例如: 跳繩、原地跑、jumping jack)
  3. 要用啞鈴嘅話,就先搵張地氈,或小朋友坐地嘅膠墊,舖地下然後先放啞鈴
  4. 屋企地板就算乾淨,都盡量用瑜伽墊,減少撞擊嘅聲浪

文章為作者意見,不代表Fitz立場。

歡迎投稿: http://fitz.hk/contribute/