[武漢肺炎] 無賽事可播 體育頻道變History Channel

英超暫停，NBA完季，香港嘅一班收費電視客戶即時喊咁口，因為大拿拿幾百蚊月費，乜都無得睇! 受影響客戶有無得追討暫時未知，不過呢啲體育頻道其實都好頭痕，因為無比賽之下，要面對多方面問題。

3月係體育旺季

3月係歐美體壇最繁忙嘅運動月份，美國稱為 March Madness: NBA 球隊要爭奪季後賽席位、NCAA 籃球同 MLB 美國職棒亦展開新賽季，其他如 NFL 及 NHL 等亦進行得如火如荼。至於歐洲方面，各大足球聯賽進入最後直路，而歐聯歐霸亦進入8強或16強階段。

以往來說，各個體育頻道喺3月除咗可以吸納更多觀眾，亦有更多廣告收入。如今比賽暫停，NBA TV 無咗最新賽事，高爾夫頻道無得睇 PGA，FOX Sports 無咗F1、MotoGP，NBC 無得睇 MLB、NFL，觀眾咪走去 Netflix 煲劇，對各個體育頻道肯定一大損失!

轉播經典賽事

ESPN 副總裁 Jay Rosenstein 直言，體育頻道喺無賽事之下，都要諗辦法填補空檔。不過可行嘅方法唔多，只得兩招:

1. 報道體壇新聞，講下疫情。如 ESPN 嘅 Sportcenter
2. 播番啲經典賽事。之但係，有幾多經典比賽可以吸引觀眾坐定定睇晒? 搞下搞下，咪變成 History Channel，榕樹頭講故咁上下

模擬遊戲都要停賽

無比賽，無電視睇，原來連打機都要暫停。一眾同運動賽事相關嘅模擬遊戲，例如 Fantasy Premier League 同 F1 Fantasy，遊戲同現實掛鈎，所以當賽事暫停，遊戲亦無嘢好玩了。

資料: CNN、BBC