[三嬸一叔] 自己人生自己揀之「退休後」

人大咗，就要自己做決定同承受所做決定嘅後果。呢啲決定包括咗揀邊間學校讀書、讀啲咩 (如果你成績好有得揀)、揀做咩職業 (如果你有資格揀)、揀住响邊度 (如果你有財力揀)、揀同邊個拍拖/結婚 (請記住你係有得揀)。

最近我好友凌伯退休，三兩知己請佢食飯。老實講，喺嚴峻疫情下肯同佢一齊 “飯敍”，都真係對大家友情嘅考驗。我送咗一對「黑鑽石」行山棍俾佢作為退休禮物。我同佢講，呢兩條鐵有60年壽命，頭30年陪佢行山，跟住果30年做佢拐杖。佢覺得果兩枝棍Z形開合法好型，亦好欣賞我嘅心意。

凌伯身體健康其實唔錯，而且學過好多種運動。佢練習太極十多年，有段時間經常游水，重好認真咁揾教練一對一咁學。佢曾經短時間學過網球同花式跳繩，不過基於各種原因，現在只剩番太極一項。

雖然好似好勁，但佢有一個超凡脱俗、與別不同嘅人生觀，就係”hea”，所以佢做運動有三樣嘢「唔會」，就係「唔會認真」、「唔會出力」、「唔會出汗」。雖然我同佢對人生嘅態度南轅北轍，而且間中會用不雅語言同佢辯論，但我仍然尊重佢嘅發言權，邊個叫我同佢係幾十年老友。順帶一提，佢對我嘅不雅語言都係不愠不怒，極其量只是以三個「唔會」回應。

飯局中，佢話退休後有好多時間，打算每日跑一小時，另加一小時重量訓練，佢重話幾個月前已經開始跟網上資料一個人去行山。我支持佢嘅計劃，但提醒佢唔好整傷對腳，同埋行山最好有人陪，以免果兩枝行山棍要提早開始第二個30年嘅任務。我亦推介佢參加我教練 KFC 負責嘅 Hoka 免費跑班，佢似乎都有興趣。

凌伯無表示對即將開始嘅新生活有咩擔憂，但好明顯佢諗唔到點樣渡過多咗嘅時間，我相信佢要時間去適應，畢竟我哋已經跟住以往個時間表生活咗幾十年。年青人踏入社會工作都要時間適應，我哋又點會例外。

我身邊班朋友好多都即將開始退休生活，無論喺經濟上、身份上都要面對轉變，如果處理失當，身心都會受到影響。雖然已經幾十歲，但我覺得我哋仍然有得揀，至少可以發展一啲興趣，最好係一動一靜，符合「養身在動，養心在靜」嘅原則。只要專注喺自己鍾意嘅事情上，無論係跑步、游水、書法，或者音樂，努力幾年後，我哋可以變成半個專家。

根據統計處數字，香港人男女平均壽命分別為82/88歲。如果60歲退休，都重有廿幾年去發展自己嘅興趣。如果揀去讀書，博士學位都可以讀完。就算身體70歲開始出現問題，我哋都仲有10年光景享受人生。所以，請記住：我哋真係有得揀，未來人生，在乎我哋現在點樣揀。

「三嬸一叔」的 Facebook 專頁