青山公路小欖段,而家仲係操車好去處。

荃灣海濱嘅單車徑,官方話4月底開始啟用,但近海濱花園一段仍然進行緊工程,亦即係話,呢條只有2.3公里單車徑,暫時只有西鐵站至灣景花園嘅大概1公里可踩。

荃灣西站單車徑入口
荃灣體育館至青荃橋一段單車徑仲未踩得

早前唔少單車友相信,荃灣單車徑開通之後,可以好快咁「一嘢轟入屯門」。不過事實係,荃灣至屯門嘅單車徑規劃分好多階段,由青荃橋至灣景花園呢段只屬「前期工程」,仲未去到戲肉。

荃灣至屯門單車徑共分4期

  • 前期工程: 青荃橋至灣景花園 (油柑頭)
  • 第一階段工程: 油柑頭至汀九
  • 第二乙階段工程: 汀九至掃管笏
  • 第二甲階段工程: 掃管笏至三聖
計劃興建嘅兩條單車橋,橫跨青山灣、加多利灣同新咖啡灣

青山灣擬興建海上單車橋

整段「荃灣至屯門」單車徑,除咗「前期工程」(海濱至麗城) 已興建完成並啟用外,其餘三個階段,有關設計同規劃,仍然未去區議會進行諮詢,亦即係未同地區人士傾掂數。工程涉及政府向私人發展商收地,以及於官地上進行建設,所以並唔係政府一方說了算。直接啲講,而家仲係十劃未有一撇,通車日期更可以話係遙遙無期。

「第二甲階段工程」初步計劃

獨立媒體》報道,早前土木工程拓展署向屯門區議會呈交咗「第二甲階段工程」嘅初步計劃,大體係咁:

  • 單車徑由青山灣展開,初段沿海而行,越過青山灣、加多利灣,至新咖啡灣後,轉入青山公路
  • 於青山灣及加多近灣,計劃興建兩條單車橋
  • 整段「第二甲階段」單車徑計劃興建包括3個單車停泊處,並於愛琴海岸對出興建約50個單車泊位

土木工程拓展署補充,政府需要收回棕月灣、春和海景花園、蒙地卡羅別墅及黃金海岸一期嘅私人土地,以令單車徑得以連貫。當局話,如徵收私人土地失敗,踩單車人士要至少推車200米。

有關計劃於本年度第三季作公開諮詢。

資料: 獨立媒體

首頁 > 運動 Sports > 單車 Cycling > [荃灣至屯門單車徑] 青山灣加多近灣計劃興建單車橋