圖片提供: 康師傅

疫情下唔少熱門山徑喺星期六日都逼滿市民,不過有人竟然涉嫌違反法例,踩單車上山入郊野公園!

越野單車踩入麥理浩徑第四段

事發喺2021年3月21日星期日,有跑友於麥理浩徑第四段到馬鞍山附近,竟然見到四人越野單車隊喺身邊踩過。當時山徑有唔少行山客,而山徑亦唔算闊落,有行山客更要閃避單車險象橫生,好彩並無釀成意外。

行山人士見到單車,好多都反應唔切呆若木雞,而呢幾部單車最後揚長而去。

圖片提供: 康師傅

《郊野公園及特別地區規例》(香港法例208A章)

我哋要認識 559G (限聚令),更要認識 香港法例208A章 《郊野公園及特別地區規例》,法例清楚列明:

「4. 任何人除非獲得總監的同意,否則不得將任何車輛或單車帶進郊野公園或特別地區,或在郊野公園或特別地區內駕駛、使用或管有任何車輛或單車。」

用人話講,單車以至任何車輛,係唔可以進入郊野公園,無論係踩入去甚至係推入去,一樣都唔得。就算係可摺合單車,理論上入袋孭上山都係唔得。

幾年前,有人試過去郊野公園 BBQ,推部單車泊喺燒烤爐側邊,都被漁護署職員抄牌罰款。

所以,將部車踩上麥徑四段,就幾乎可以肯定干犯有關法例,大家行山時見到有人違法,可以致電有關部門求助。

10條越野單車徑

大棠一帶是合法的越野單車徑

其實郊野公園裏面,已經開放15條越野單車徑,有啲仲係單車專用,行山人士免進,踩單車都唔怕阻到人。

  • 清水灣郊野公園–釣魚翁越野單車徑 (星期日及公眾假期不適用)
  • 南大嶼郊野公園–芝麻灣越野單車徑
  • 南大嶼郊野公園–梅窩至貝澳越野單車徑
  • 南大嶼郊野公園–貝澳至狗嶺涌越野單車徑
  • 西貢西郊野公園及西貢西郊野公園 (灣仔擴建部分)
    • 海下至灣仔越野單車徑
  • 石澳郊野公園–龍脊越野單車徑 (星期日及公眾假期不適用)
  • 大欖郊野公園
    • 河背越野單車徑
    • 小欖越野單車徑
    • 大欖涌水塘越野單車徑
    • 大棠越野單車徑
    • 田夫仔越野單車徑
    • 田夫仔北越野單車徑
    • 清快塘越野單車徑
    • 青龍頭越野單車徑
    • 荃錦越野單車徑

資料: 《郊野公園及特別地區規例》


文章為作者意見,不代表Fitz立場。
歡迎投稿: http://fitz.hk/contribute/
首頁 > 運動 Sports > 單車 Cycling > 麥理浩徑四段踩越野單車 涉違反郊野公園條例