中國網紅單車踩勻全國 | 到訪香港後戰車旺角被偷欲哭無淚

擁有過100萬抖音粉絲嘅中國網紅「潮汕阿秋 (骑行中国)」，自稱於2019年7月1日開始，以踩單車方式環遊中國。佢足足踩咗3年，走勻全國32個省，於第1344日踩到香港。

嚟到香港之後，佢去咗迪士尼，以及到《國產凌凌漆》電影裏面嘅「麗晶大賓館」遊覽。

不過，阿秋日前將單車泊喺旺角花園街後，返去攞車嘅時候發現單車鎖被剪，單車不翼而飛，佢唯有報警。警方證實，3月9日下午接到33男子報案，警方依盜竊案處理，暫時未有人被捕。

至於阿秋無咗部單車後，都唔知可唔可以繼續行程，佢話要等心情平伏先作打算。