疫情令全球掀起單車熱潮，唔少國家甚至出現單車舖排長龍，單車缺貨等情況。早前以行動推廣單車通勤嘅英國首相 Boris Johnson，佢嘅戰車Viking Pro更一度賣斷市。幾家國際性單車企業，亦喺全球經濟下滑情況下，逆市獲巨利。
台灣巨大Giant
台灣兩大單車品牌「巨大」Giant 同「美利達」 Merida，於第二季都錄得巨大利潤。Giant 受到近期強勁需求帶動，第2季單季營收197億元，較去年同期大幅成長27.81%，創下單季歷史新高。集團話，下半年會發展四大款式 Giant、Liv、Momentum 及 CADEX，並推出更多唔同型號嘅單車，滿足消費者需要。
另一間台灣單車企業美利達 Merida，亦受惠於需求大升。Merida 近年大力發展電動單車 e bike，銷售量由去年23萬台，到今年有28萬台，而全年目標希望達到50萬台。
印度Hero Cycles
坐擁多個歐洲及英國品牌的印度單車企業 Hero Cycles，截至今年7月已售出40萬部單車，而去年全年銷量只有27萬。不過，市場人士透露，由於印度掀起反華運動，單車零件嘅生產線將由中國返回印度，單車生產量未必能夠滿足市場需求。
上海鳳凰
於上海交易所上市上海鳳凰，股價自2016年以來屢創新低。早前公佈嘅業績更顯示，受疫情影響生產線停產以及銷情下降，本年估計銷售只會達到預測的50%。睇嚟全球單車風潮，對呢間中國上市企業無乜幫助。
企業賺錢唔賺未關消費者嘅事，只要佢哋啲產品價錢合理，好使好用，大家已經心滿意足。
資料: Bloomberg Quint、聯合新聞網
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。
