Fitz > 運動 Sports > 單車 Cycling > 德國小鎮500米長單車徑 令市長一夜成名

德國有個小鎮叫弗賴辛 (Freising),座落於慕尼黑東北方35公里,人口只得40,000人。大家未聽過呢個地方一啲都唔出奇,不過最近佢就因為一條500米長嘅單車徑 (上圖),令市長一夜成名。

呢條起到波浪咁嘅單車徑,其實係一個工程嘅失誤。早前呢一段道路進行翻新工程,不過起好馬路,起埋行人道之後,市政府先發現無留位起單車徑。於是,佢哋唯有向路旁伸延,將單車徑起喺路邊。但因為路邊係河床,亦有唔少農田用嘅灌溉系統,為咗唔影響呢啲設施以及控制工程費用,就要將單車徑起成波浪一樣。

不過,單車徑通車之後,當地居民非但無不滿,而且非常受落。有市民話喺上面踩單車完全無問題,仲支持政府為咗保護農業設施而將條路起到咁。

居民話好鍾意條單車徑

至於當地市長 Uwe Gerlsbeck,亦因為咁有「創意」以及可以為政府慳到錢,備受公眾關注。市長話,自從呢條單車徑起好之後,佢每日都收到來自四面八方邀請訪問,為咗唔打擾日常工作,佢已經拒絕晒所有人。

市長向公眾強調,呢條路只係望落去有啲怪,到附近嘅花草重新生長之後,一定會令大家心曠神怡!

資料: Süddeutsche Zeitung