[香港單車徑] 多輪單車有特定規例 只限專用地點行走

要數香港人踩單車有咩討厭行為，排頭位一定係四輪單車喺單車徑奔馳。星期六日，沙田、吐露港，不時見到一家大細，優哉悠哉遊車河，不過後面嘅人就好慘，爬頭未必有機會，只有跟住佢哋後面食塵。

無可否認，香港單車徑已經唔係闊，一條行車線行一部兩個轆嘅單車已經窄窄地，如果有人踩部四輪單車，肯定會造成大擠塞!

四輪單車有限制

大家睇清楚一般單車徑嘅標誌，路牌裏面嘅單車係兩個轆。即係話，香港一般路面單車徑，只限兩個轆嘅單車行駛。而四個轆嘅四輪單車，就有特定嘅規例:

1. 多輪車只限於專用單車徑行走 (例如大美督)。踩四輪單車，要睇清楚係咪「多輪單車徑」
2. 11歲以下兒童，需由成人陪同才可使用

所以，我哋平常喺沙田、吐露港見到四輪車，就已經違反法例。

其實有無犯法都好，見到條單車徑上車來車往，都應該知道唔太適合踩住咁大部、又唔會踩得快嘅四輪單車阻礙交通。

資料: 道路使用者守則