[香港單車徑] 有危險 落車推 政府邏輯有無問題?

筆者整理香港單車徑資料時，同時亦參考幾個政府部門單車法例及守則，原來有唔少地方都值得大家思考同討論。其中一處，就係運輸署的《單車徑上的最新交通管理措施範例 (分階段推廣)》。

根據網頁資訊，措施於2011年實行，包括三部份:

1. 行人過路處與單車徑交匯

即係話，當單車徑遇上行人過路處，過路處嘅路面，會油上黃色，提醒踩車人士減慢速度，以及注意行人。

 

2. 單車徑斜路有急彎

因為單車落斜速度好快，會喺急彎路段設置黑白色道路標記。此外，喺進入斜路之前，踩車者亦要落車。

3. 單車徑起點及終點

單車徑起點及終點會設置減速欄 (分鐵欄同膠欄)，提醒踩車者慢駛及落車。

政府邏輯

睇睇上面幾項「管理措施」，可以顯示出政府部門喺管理單車徑方面，有一套特定邏輯:

1. 有危險，要落車

好似上面第二項措施，落斜有急彎就要踩車者落車。另外過紅綠燈時，明明係綠公仔，騎車者都一定要落車推。似乎政府相信，落車就係化解危險嘅最好方法。

2. 減速欄定係跌車欄?

喺相對無咁危險嘅情況 (例如行人過路處)，香港單車徑普遍使用減速欄。雖然近年有關當局改將鐵欄改成膠欄，但佢哋仍然會增加騎車者受傷嘅風險。

3. 行人大晒?

去到行人路口或過路處，單車唔係要減速就要落車。單車喺香港法例屬於交通工具，咁要行人遷就單車，例如要等到無晒單車先可以過路，係咪完全無理?

筆者利申，平時都係為咗消閒踩車，唔識亦唔會「片車」。不過香港環境所限，單車徑已經被設計成「斷截禾蟲」，咁喺管理措施方面係咪可以做得好啲?  而且，如果政府發現某些路段有危險隱患，係咪應該將路面設計得好啲，而唔係下下叫騎車者落車?

資料: 運輸署單車徑上的最新交通管理措施範例 (分階段推廣)、立法會文件《單車設施的概括性改善措施》(2010年)