超難賽跑遊戲《QWOP》AI幫手下破100米紀錄

2008年，澳洲業餘遊戲玩家，設計咗《QWOP》嘅 Flash 電腦遊戲。遊戲方式好簡單，就係靠按鍵，控制螢幕上嘅跑手完成100米路程。

遊戲推出兩年之後，突然喺網路爆紅，不過並唔係因為遊戲太好玩，而係太難玩! 呢款遊戲只准玩家操控 Q、W、O、P 四個鍵，控制跑手嘅大小腿，以進行跑步動作。不過實際操作非常困難，稍為操控不當，就會令跑手向前或向後仆，所以一般人可以完成10米，已經係高手之中嘅高手。

因為遊戲劣評如潮，反而激起唔少人決意向難度挑戰，其中日本人更對呢個遊戲樂此不疲，近年前10個紀錄，日本玩家壟斷當中八個。

最近就有人開始打 AI 主意，以電腦編程去操控遊戲。居住美國嘅玩家 Wesley Liao，就用AI技術成功打破日本人創下嘅世界紀錄。經過40小時學習後，AI終於以47.34秒刷新100米紀錄，有片為證。

值得一提嘅係，最近有日本玩家更喺《QWOP》成功打破42.195公里紀錄，前後用咗7小時57分31秒分N次完成，真係少啲毅力都唔掂，有興趣可以上twitch睇片。