----- 廣告 Ad -----
有人講過，使用健身室都要有禮儀，其中一項就係叫人唔好喺健身室「鳩叫」，話亂咁嗌會影響他人。不過，其實大嗌係有科學根據，嗌出聲絕對可以更有爆發力，而且嗌嘅內容仲應該要有攻擊性!
根據英美兩間大學 (Keele University 及 Long Island University) 於2017年合作嘅研究指出，人類喺爆粗鬧人 (swearing) 嘅時候，會激發更多力量，可以舉到平時舉唔到嘅重量。
有關大學徵集約50名嘅自願人士進行研究，將佢哋分為「大叫組」同「唔可以大叫組」，結果顯示可以大叫一組，喺健身舉重以及等距手柄測試 (isometric handgrip test) 中，表現較無得叫嗰一組更好，力量更強，持久力更佳。
研究人員話，當人類大叫時更有能力忍受疼痛，刺激人體嘅交感神經系統令心臟跳動更快。而且研究人員更發現，大叫嘅內容一涉及到鬧人，甚至爆粗，效果更佳。
所以，第日喺健身室聽到有人粗口爛舌，未必係佢唔斯文，佢只係唔夠力啫。
資料來源: Keele University
張伯倫
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。