香港有唔少鍾意郊野海洋嘅有心人,會定時定候出動執垃圾。最近「上山下海執垃圾 GoGo Clean Up」就喺海邊發現一件,搞到佢哋差唔多無晒符嘅大型垃圾。呢件垃圾姑且稱為「石屎發泡膠」。

石屎發泡膠

  • 發現地點: 西貢鹽田梓附近
  • 重量: 估計超過50公斤
  • 體積: 目測 1m X 0.5m X 0.2m
  • 結構: 外面係石屎,入面有一堆發泡膠
  • 危害: 石屎浸水會剝落,石屎剝落後會暴露入面嘅發泡膠,發泡膠遇水遇風會迅速分解,污染環境

負責垃圾活動嘅「貓哥」向筆者解釋,平常以獨木舟或小艇搬運海洋或海邊垃圾,所以遇到佢真係難以入手。佢哋先用大鎚揼開石屎部份,然後慢慢將裏面嘅發泡膠挖出嚟,再分件將垃圾運走。「貓哥」話,一件石屎發泡膠前前後後要搞成個鐘頭。

「因為件嘢有發泡膠,所以真係唔搞唔得。因為發泡膠一散咗,會吹到周圍到係,造成好大污染。」

貓哥

鬼網確係鬼

「石屎發泡膠」雖然難搞,不過佢見過咁多海洋垃圾,並唔算最討厭。「貓哥」話,最討厭嘅海洋垃圾一定係俗稱「鬼網」嘅廢棄漁網。

「鬼網」有幾衰?

  • 「鬼網」以塑膠製成,浸喺海洋會釋出微膠粒
  • 漁網用途係捕魚,所以結構相當扎實,要清理嘅話,需要一番工夫
  • 「鬼網」會纏死海洋生物,包括珊瑚

上山下海執垃圾 GoGo Clean Up 群組係由一班關心郊野、海洋嘅義工組成,會定時出動執垃圾。

筆者按: Netflix紀錄片《深海陰謀》講述捕漁業對海洋生態嘅破壞,裏面深入探討鬼網問題,值得一睇。


文章為作者意見,不代表Fitz立場。
歡迎投稿: http://fitz.hk/contribute/
首頁 > 運動 Sports > 行山 Hiking > 一件令義工無晒符嘅海邊垃圾