聖誕新年長假期,大帽山成為旅遊熱點,大批市民上去睇雲海、睇元旦日出,甚至去感受寒流,加埋假期出動嘅行山人潮,無論日頭同夜晚大帽山道都人車為患,「大帽山塞車」成為 Facebook「駕駛group」同「行山group」最常見嘅消息。大帽山道已經同屯門公路、龍翔道以及開源道同級,令人諗起塞車。

要解決大帽山道塞車問題,話難唔難,話易唔易,肯下決心就得。

大帽山道主要問題

大帽山道由荃錦公路 (荃錦坳) 為起點,為到達山頂天文台氣象站嘅唯一馬路。到大帽山觀景台閘口約2公里,再上山頂約4.5公里,落至四方山馬路盡頭,約6.1公里。另一條路往施樂園,由荃錦坳起步約2.7公里。另外,閘口往山頂方向屬車輛禁區,未經准許不得進入。

大帽山道常都有塞車問題,與道路設置及泊車位有關:

  • 停車場: 大帽山山腳停車場,包括燒烤場扶輪公園嘅私家車及巴士泊車位,遊客中心泊車位 (約10部私家車,但並非長期開放),以及荃錦公路扶輪營地外嘅泊車位 (約20部私家車)。
大帽山路斜路窄,車輛易發生意外
  • 道路設計: 大帽山道基本是單線雙程行車,部份位置非常狹窄,車輛遇有對頭車需於駛至避車處讓路
左邊避車處
  • 避車處: 道路設有多個避車處,其實唔可以泊車,如果泊晒滿車,會令交通更擠塞
  • 閘口平台: 呢個位置為咗方便車輛掉頭,或方便去施樂園嘅車輛轉彎。
非准計車輛不得進入閘口

即係話,如果閘口平台,以及沿途各個避車處都泊滿車,咁就算有車想落山,都會畀上山嘅車塞住,結果就係大家都郁唔到。2020年除夕晚就係因為咁,山腳塞住等上山嘅車,令荃錦公路大塞車,警察要封閉大帽山道,唔畀車入。

一招可解決問題

要完全解決大帽山道車輛問題,方法只有一個:

將禁區閘口推前去遊客中心出面,大家要去觀景台,或要上山頂,只能靠雙腳。

遊客中心

由於遊客中心以下嘅大帽山道都係雙程路,加上距離不長,所以就算多車都唔會有太大影響。遊客中心停車場假如泊滿,亦可於荃錦公路設置告示板,指示車輛唔好駛入。

呢個做法當然不便駕駛人士,不過比起受塞車影響嘅行山或踩單車人士,加上足以減低意外風險,相信係無辦法中嘅辦法。


文章為作者意見,不代表Fitz立場。
歡迎投稿: http://fitz.hk/contribute/
首頁 > 運動 Sports > 行山 Hiking > 一招解決大帽山塞車問題