一招解決大帽山塞車問題

聖誕新年長假期，大帽山成為旅遊熱點，大批市民上去睇雲海、睇元旦日出，甚至去感受寒流，加埋假期出動嘅行山人潮，無論日頭同夜晚大帽山道都人車為患，「大帽山塞車」成為 Facebook「駕駛group」同「行山group」最常見嘅消息。大帽山道已經同屯門公路、龍翔道以及開源道同級，令人諗起塞車。

要解決大帽山道塞車問題，話難唔難，話易唔易，肯下決心就得。

大帽山道主要問題

大帽山道由荃錦公路 (荃錦坳) 為起點，為到達山頂天文台氣象站嘅唯一馬路。到大帽山觀景台閘口約2公里，再上山頂約4.5公里，落至四方山馬路盡頭，約6.1公里。另一條路往施樂園，由荃錦坳起步約2.7公里。另外，閘口往山頂方向屬車輛禁區，未經准許不得進入。

大帽山道常都有塞車問題，與道路設置及泊車位有關:

• 停車場: 大帽山山腳停車場，包括燒烤場扶輪公園嘅私家車及巴士泊車位，遊客中心泊車位 (約10部私家車，但並非長期開放)，以及荃錦公路扶輪營地外嘅泊車位 (約20部私家車)。

• 道路設計: 大帽山道基本是單線雙程行車，部份位置非常狹窄，車輛遇有對頭車需於駛至避車處讓路

• 避車處: 道路設有多個避車處，其實唔可以泊車，如果泊晒滿車，會令交通更擠塞
• 閘口平台: 呢個位置為咗方便車輛掉頭，或方便去施樂園嘅車輛轉彎。

即係話，如果閘口平台，以及沿途各個避車處都泊滿車，咁就算有車想落山，都會畀上山嘅車塞住，結果就係大家都郁唔到。2020年除夕晚就係因為咁，山腳塞住等上山嘅車，令荃錦公路大塞車，警察要封閉大帽山道，唔畀車入。

一招可解決問題

要完全解決大帽山道車輛問題，方法只有一個:

將禁區閘口推前去遊客中心出面，大家要去觀景台，或要上山頂，只能靠雙腳。

由於遊客中心以下嘅大帽山道都係雙程路，加上距離不長，所以就算多車都唔會有太大影響。遊客中心停車場假如泊滿，亦可於荃錦公路設置告示板，指示車輛唔好駛入。

呢個做法當然不便駕駛人士，不過比起受塞車影響嘅行山或踩單車人士，加上足以減低意外風險，相信係無辦法中嘅辦法。