Video: 阿晨 Sunny 浪廚
Text: 電兔小玉 Yuki

以為春天就無雪睇?! 非也非也! 喺本州中部嘅立山黑部雪の大谷仲可以睇到兼玩到雪,佢已經喺4月15日開咗山,嚟得日本中部未上過睇雪牆,就好似「不到長城非好漢」! 所以膽粗粗就咁去咗行立山黑部,仲睇到果日最高點嘅15米雪牆。嗱! 果日上到美女平嘅時候,大霧到一個點,真係以為再上去無景睇,出師不利,食白果! 點知穿過雲層之後,就係另一個世界~

Photo by Yuki

立山黑部

日本立山黑部阿爾卑斯山脈路線,是橫越長野嘅赤澤岳 (2678米) 及立山 (3015米) 兩座大山一條長通道,日本嘅長野縣係本州最凍嘅縣之一,一年有超過7個月都係雪封,春夏秋3季濃縮到只有5個月,所以啲雪又厚又靚。要睇山黑部雪の大谷靚雪景記得留意開放時間,今年官網話係4月15日至6月22日,官網嘅野講就咁講啦,但都要有心理準備人多車多,都係早去早着,免得到時睇嘅係人海同埋變黑嘅雪啊!

Photo by Yuki

嗱! 5月8日號入山都算早啦啩,但都開始有「黑雪」!

官網截圖

雪の大谷唔係成日都咁好天,難得果日好好彩係開放,果朝食粥定食飯都係靠睇呢個官網公告!

而下邊就係成條路線嘅開放時間:

  • 全線開通期間(電鐵富山 ~ 信濃大町)2018年4月15日 ~ 11月30日
  • 部分開通期間(電鐵富山 ~ 彌陀原)2018年4月10日 ~ 4月14日
  • 12月1日 ~ 4月9日為停業期間

點樣上去?

由話想去到真係買機票去行立山黑部,都係幾分鐘嘅決定,買埋機票之後,就做下功課睇下啲路線、交通點搞法? 話晒對於呢個立山黑部都真係「零」concept! 其實要睇晒成條路線嘅景點,係真係要用成日時間同搭唔同嘅交通工具,又登山纜車、又高原巴士、無軌電車呢呢路路咁! 聽到係咪都覺頭暈,但只要買好需要用嘅 Pass 就無問題,就可以輕輕鬆出發立山黑部!

官網截圖

呢個就係橫切圖,好清楚睇晒立山黑部成條路線出嚟!

官網入邊就有好多條路線建議大家嘅,但我地今次決定取道於富山作為開始! 點解? 首先未玩過本州中部,咩金澤、富山、長野等等;二來北陸新幹線開咗,行完立山黑部可以去大阪又得、名古屋又得,任君選擇! 啱晒事後去大阪瘋狂shopping!

官網截圖

根據呢張地圖,再另外 plan 行程咁! 由大阪電波少女咁長途車直上富山,然後去立山站玩到到信濃大町,之後拎行李再返長野,打道返大阪。

言歸正傳先,5月8日一大早民宿出發電鐵富山站搭06:04班車,去到第一站立山站都係07:15左右,由於好驚好多人排隊,所以前一晚臨出發前check晒交通時間表,預鬆啲時間或者萬一真係人多都知道下一班車係幾點!

老老豆豆,咪以為就搭電鐵去到立山站,之後一直係咁見車就上就到雪の大谷….其實要喺JR富山站買番張立山黑部加購票,先可以由立山暢通無阻咁去到長野!但網上好多唔同玩法嘅,豐儉由人! 今次我地大阪去大阪返,係大阪関西機場買左張関西及北陸地區鐵路周遊劵,再買埋呢個加購票就perfect晒!

Photo by Yuki
Photo by Yuki

05:30由民宿行去電鐵富山站,為嘅係趕06:04呢班去立山站既電鐵。

Photo by writer

呢張係乜東東!? 咪就係立山黑部嘅加購票,記得去立山黑部前一日買,即日買係用唔到!

Photo by writer

記得成程要袋穩佢啊! 每個站都要靠佢嚟先上到車~

嚟到第二站美女平,一落車就呆咗! 唔係因為靚到呆咗,而係大霧到呆咗! 不過本著「世事無絶對,只有真情趣」同埋港人打卡嘅心態~就出咗去睇棵千年美女杉就搭高原巴士,去我地行程嘅重點室堂,行雪の大谷! 九曲十三彎之後,當以為一切都係好迷幻嘅時候,叮噹叮噹!

突然間溫暖嘅陽光、白雪雪嘅雪山就係眼前,淨係識得嗱嗱臨帶番副超,驚死 miss 咗任何一個靚雪山! 靜靜咁睇風景…….

Photo by Yuki
Photo by Yuki

沿途都比咁靚雪山包圍住!

大概09:00左右就咗室堂站,就係行程重點雪の大谷起點,佢係室堂站出邊差唔多400米嘅路。果日天氣好到不得了,話就話係平路,但去到仲見到有雪鋪係路上邊,都要著番對雪靴、著番件防水防風保暖褸、手套,咁先可以玩到雪,唔會凍僵變雪條! 玩還玩,喺日照咁勁嘅地方最好都唔好除副黑超啦~免得傷到對眼啦! 如果你有夠勇氣嘅話,可以去行去後山挑戰地獄谷! 玩完雪我地就搭無軌電車去下個景點大觀峰、黑部平、黑部湖最後到終點扇澤!

Photo by Yuki

室堂車站出口,已經靚到咁! 後邊就係雪の大谷嘅入口。

Photo by Yuki

被兩邊雪牆包圍住雖然好似入左雪櫃咁嘅感覺,但畢身難忘!

Photo by Yuki
Photo by Yuki

好好彩咁好天,而且當日雪牆最高點係15米高! 咪以為唔凍,企得耐都凍到流鼻水!

Photo by Yuki
Photo by Yuki

嚟到2316米嘅大觀峰,眼前嘅景色可以無言以對!

Photo by Yuki
Photo by Yuki

呢部就係立山架空索道,由大觀峰直送去黑部平,好似搭緊海洋公園嘅纜車咁,當然係大好多啦!

Photo by writer

去到差唔多尾聲嘅黑部水庫嘅黑部湖。

Photo by writer

呢度就係黑部水庫堤壩,喺6月至10月有機會可以睇到洩洪啊!

Photo by writer

完成人生 bucket list,開心到彈起!

行李托運服務

唔好以為我地好似好輕鬆,咩行李都無! 今次我地立山黑部玩番落京都大阪,所以我地出發前早一日就將行李寄去我地下一個目的地長野,寄行李位置就喺電鐵富山站,由於發生啲小意外,我地要將行李寄去信濃大町然後用加購劵搭去長野返酒店!

  • 收費: 每件行李1,300日圓
  • 送達時間: 當天15:00 至 17:00
Photo by writer

登山注意小事項

  1. 室堂高達2400米,4、5月山上最高都係得10度,今次我地去都係得6度左右,所以要著夠保暖衣物、防風防水外套、圍巾、冷帽、抓地能力高嘅行山鞋、太陽眼鏡同防曬。
  2. 密切留意立山黑部官網,會有人流預測報告睇,所以揀好登山日子就多啲 check 吓!
  3. 話明開山,人流一定多,雖然去到室堂會有小型食堂比你,但最好都自備多啲乾糧啦~因為係得少量企枱比你呀咋,無謂迫住咁食熱食同飲熱湯啦!

Relive ‘Morning Walk’


阿晨 Sunny 浪廚 Facebook專頁
電兔小玉 Facebook 專頁

Fitz 連結: https://fitz.hk/?p=96495


更多:
Fitz Facebook專頁
[日本登山] 登上富士山 其實唔難 (登山篇)
[Dear Yama] 日本登山的禮儀和態度
[日本百名山] 關東以北最高山峰 日光白根山
Fitz Hiking 行山

廣告