上大東山打卡又收割 芒草真係有寶?

踏入秋天，排隊上大東山打卡呃like嘅日子又開始，大東山嘅山徑又被大批旅客蹂躪，而逃唔過厄運嘅，仲有山上面嘅芒草。

The hiking Database 山野‧新聞庫 發表一張相片 (上圖)，影到有旅客將一束芒草帶落山。與此同時，網上流傳另一張相片，有人甚至出動剪鉗「收割」芒草。

按圖放大 圖: IG @kelvinboyy

唔少人都問: 芒草有寶咩? 做乜要拎返屋企? 原來芒草真係有寶! 大前題係，芒草無畀人剪走。

芒草的價值

芒草除咗畀人類打卡，對大自然生態其實相當重要:

• 小動物食物來源: 芒草係好多雀鳥，以及小型哺乳類動物嘅食糧。根據台灣嘅研究，野豬亦會食用芒草莖部，以吸收食物纖維
• 動物之家園: 芒草係鳥類、鼠類等生物嘅築巢物料，有雀鳥甚至將鳥巢興建在芒草叢裏面。台灣黑熊體型雖大，亦會用芒草編織窩居
• 潔淨泥土:  芒草具有相當高嘅光合作用效能，有助分解泥土嘅鹽份及重金屬。此外芒草生長快速，栽培容易，亦有助郊野環境在破壞後得以復原

> 資料: 台灣東眼山自然教育中心

賞芒要留神

The hiking Database 山野‧新聞庫 提醒遊客，觀賞芒草嘅同時，亦要注意郊野環境:

1. 切勿行入芒草堆拍攝，路過的地方會踩出一條行人路，變相破壞景觀；
2. 也不要採摘植物，因為芒草摘出是不能再種植的，有害無益；
3. 影相拍照要注意安全，小心蛇類在草堆中出沒；
4. 避免使用高危動作拍照，例如攀爬、崖邊自拍……；
5. 近日天氣乾燥，小心山火，更不要在草堆之間使用任何方法生火，例如抽煙、玩滴滴金……；
6. 自己垃圾自己帶返市區處理，近日垃圾問題極之嚴重，希望各位自律；
7. 秋冬季日短夜長，要預留時間，建議下午5點前要落到山，以免摸黑落山增加風險；
8. 行山是有風險的活動，請做好充足準備 (詳情可報讀MU認可的山藝課程)；
9. 結伴同行，可保平安 (同行者要有經驗行山人士為佳)；
10. 一切戶外活動，安全優先，避免不必要的風險。