大叔話4月16號帶我去跑步,佢話係一個可以人同狗一齊參加嘅跑山比賽(詳情可到以下網址參考:http://trailwaggerhk.com),由大嶼山嘅梅窩經由東灣頭再過稔樹灣最後到達終點愉景灣中央公園,而且仲可以為Animals Asia籌錢㖭,何樂而不為?我間唔中都有陪大叔上山練習,好似去過雞公山、馬鞍山同釣魚翁山咁嘅,路程平均都有八公里以上。所以呢個比賽應該都唔係咁難,而且可以識吓新朋友都幾好吖!所以我二話不說「汪汪」就應承咗佢。

起步點@囉唆大叔
起步點@囉唆大叔

比賽果朝,我同大叔晨咁早起身,跟佢食少少早餐,去埋大細,就坐車出去港外線碼頭,呢次係我第一次搭渡海小輪咋!我識咗一個女仔叫做亞妹,佢好詩文;我哋要坐慢船嘅下層入梅窩,又要買飛,又要戴口罩,好彩水手伯伯唔係揸得咁嚴啫。

正在吹著海風欣賞維港美色的我,突然聽見有狗狗叫我「靚仔」,原來係船尾嘅一大班參賽者,佢地唔同大細、唔同品種,佢地主人都話未見過咁大件拉布拉多嘅我。我一直都保持著45公斤,早兩個月成為公公之後,可能仲肥咗,肚腩都突哂出嚟,出街俾人笑「肥仔、大隻仔」;想深一層,真係唔可以就咁樣自暴自棄,一定要跟大叔多運動先可以搵番自信同自己條腰先得;依家成日食飽就瞓,瞓飽又食,真係無咩狗生樂趣,唔通呢個就係我嘅「狗臉的歲月」?

Mocha又熱又攰@囉唆大叔
Mocha又熱又攰@囉唆大叔

從梅窩碼頭行去起步點大約十分鐘,喺遠處就已經見到好多素未謀面嘅狗狗,大家互相寒暄一下,嗅嗅對方氣味,交個朋友啦喟!影過大合照,哨子聲一响,我就一支箭追趕前面嘅參賽者,不過大叔硬係拉實我,因為後面仲有一大段路同上斜,唔留力的話,一定會斷氣。當日溫度濕度都頗高,我行著大斜路同樓梯,好快已經扯哂蝦,大叔見我條脷越伸越長,就立即俾水我飲。其實,條路好易行,不過今日實在太熱、又唔係地頭、又肥咗懶咗,表現真係有些少失色。

補給站@囉唆大叔
補給站@囉唆大叔

幾經辛苦,最終嚟到山頂補給站,有水有橙有雪條留俾主人,我就繼續食我嘅零食。大嶼山嘅風景真係優美,好有未經人工雕琢嘅自然美態;依家好多地方俾人強拆開發,香港人真係唔能夠再獨善其身,一於齊來保護我地最後一遍大自然寧靜嘅樂土。

真。消暑@囉唆大叔
真。消暑@囉唆大叔

天氣實在太悶熱,當行到一處清泉溪流的時候,狗狗都毫不猶豫跳落去消暑一番、冰震肚皮同手腳,超爽呀!跟著落斜嚟到稔樹灣村,原來就在海岸邊有一大片農地,種植有機菜;雖然老農夫話仲差兩個星期先可以收割紅菜頭,但係佢都好有心咁提醒我地响街市絕對唔好買菜芯,因為有好多好多農藥㗎喎!

阿妹與Mocha@囉唆大叔
阿妹與[email protected]囉唆大叔

雖然我都聽過The Beatles唱 A Hard Day’s Night 時話「I’ve been working like a dog」,但係平日做到變咗我,放假行吓山、游吓水、放鬆心情、沉澱思緒,又可以重新得力。所以「正苦同地摌傷」,你地咪再打郊野公園主意啦唔該,俾條山(生)路行吓好唔好!?

最後兩公里係响愉景灣外圍渡步返回終點,雖然大叔還想拉著我跑,只可惜我嘅體力已經用到盡,好似麥兜咁話:「企定定喺度」。一條暗斜行人路,竟然將我難倒,我真係有些少過意唔去。原本有架高爾夫球車可以載我返終點,不過既然仲差幾百米,所以抖一抖、飲啖水、食零食之後,又繼續上路,好快就可以見番好多新朋友啦!其實,唔同重量組別嘅冠軍狗狗一早已經衝過終點,呢度超正,有好多軟骨零食、又可以無拘無束咁响大草地上你追我逐,好自由奔放呀!大叔問我:「你唔係話攰嘅咩?」

終點草地@囉唆大叔
終點草地@囉唆大叔

最最最開心係大嬸同三位阿姐阿哥都願意山長水又遠咁專程搭車入嚟支持我,真係好多人錫我呀!做狗做到好似我咁都真係好幸福啊!

原文載於網誌這是一遍融合人、大自然、生活態度與公義的樂土。

更多:
Fitz.hk Facebook專頁
失眠前 我想記得在香港之巔的四十七件事
玩樂山澗遊
囉嗦大叔@Fitz.hk
Fitz Hiking 行山