香港郊野,不時見到牛牛踪影,呢啲牛大多數來自上世紀70年代,因為當時都市發展農民棄置耕地,耕田嘅牛隻被放逐。呢啲牛牛於是走入郊野繼續繁衍,數目與日俱增,成為而家我哋見到嘅流浪牛。

根據漁護署公佈最新數字,全港有約980隻黃牛及160隻水牛,當中約800隻已絕育。所以,漁護署估計,10年後嘅流浪牛隻數目將會大減,數量只有而家嘅一半 (即係約600隻)。

香港牛牛命途坎坷

唔少行山人士遇到牛,都會相當興奮,不過佢哋命運相其實當坎坷。

遷移至荒漠

漁護署於2011年成立牛隻管理隊 (牛隊),展開「捕捉、絕育、遷移」計劃,將流浪牛遷移至西貢創興水上活動中心旁邊空地。不過唔少關注流浪牛嘅組織指,近年越來越多牛隻遷去呢到,但創興中心一帶嚴重沙漠化,細小嘅草地根本唔夠牛隻所需。

現時定時有牛義工自願運送牧草餵飼牛隻,但並唔係長遠解決方法。

食垃圾為生

近年大批市民走入郊野行山及露營,人類嘅餵食,以及無公德心市民棄置嘅郊野垃圾,都嚴重影響牛隻健康。

塔門係露營熱點,成日都有人留低大量垃圾 圖: 網上圖片

護牛九式

關注流浪牛嘅組織貢想 Vision Sai Kung 早前提醒市民要善待郊野牛隻,提出「護牛九式」:

  1. 包容牛便: 牛便便 (牛屎) 係草嘅養份,見到牛屎唔好理佢,有得留喺草地上。
  2. 勿打牛、勿嚇牛: 牛係溫馴動物,唔會主動攻擊人類。
  3. 勿摸牛B: 母牛聞到牛BB有人類氣味,係唔會再餵哺佢。牛BB如果飲唔到牛媽媽嘅奶,係會餓死的。
  4. 勿餵牛: 牛應該只係食草,唔應該食人類食物,更加唔應該食雞翼豬扒,甚至牛扒!
  5. 帶走垃圾: 拎幾多嘢去露營行山,就帶返幾嘢出市區。記得將垃圾帶離郊野至有馬路嘅垃圾桶、垃圾站。
  6. 保護草地: 營友離開時至少將4至5公升清水淋於紥營嘅草地。更加唔好燒草地,BBQ、煮食要用爐架或煮食枱。
  7. 收好食物:不要將食物、膠袋、垃圾隨處放,盡量放入營帳內,並拉好雙拉鏈,避免牛牛誤闖吃人類食物。試想假如每個營帳吃一個膠袋,日復日,牠們真的會死。
  8. 保護牛牛: 發現有人虐打牛牛,請出面干預,並提醒佢香港有法例保護所有動物 (169條例),一旦觸犯法例,可被罰款20萬元及監禁3年 。
  9. 勿亂post牛相: 唔好公開牛BB相,3歲以上成年牛牛先好出,以免被有關人士強行帶走。Post 相麻煩遮耳牌,唔好標籤亦唔好明星化佢哋。
塔門牛牛 圖: 貢想 Vision Sai Kung

牛年進步,希望郊野嘅牛牛同大家都可以力爭上游。


文章為作者意見,不代表Fitz立場。
歡迎投稿: http://fitz.hk/contribute/