[半年7宗奪命行山意外] 在山上不要心存僥倖

圖中為狗牙嶺一線脊 (圖: Kai Hin)

用官府口吻，行山有益身心，男女老幼人人啱。不過健康活動，亦必須要注意安全。

呢個周末又喺新聞睇到，有山友在紅石門遇難，單係2017年下半年，已經有7位朋友喺行山活動中不幸身亡，令人甚為心痛。

2017年下半年行山遇難事件 (截至12月10日)

(按圖放大 文末有相關新聞連結)

每次出現這些新聞，我哋當然好痛心。不過同時，網上亦有唔少朋友，第一時間會衝出嚟講：

「又係嗰啲唔做準備為咗呃like唔識死嘅人亂衝亂撞呀話?」

呢句說話，當然唔錯得晒，不過有商榷嘅餘地。

「郊遊人士」其實「好安全」

我唔否認某些行山事故，係源於一啲山友不負責任嘅行為，但其實只要留意一下新聞，就會發現嗰啲只係帶住500ml樽裝水上大東山睇芒草，或者拖住女友鳩衝上馬鞍山嘅「郊遊人士」(注意，佢哋唔可以談得上行山，佢哋心態只係郊遊!)，佢哋反而唔會有嚴重意外。因為大多數時候，佢哋未去到懸崖已經要打電求救。

事實上，睇番上面不幸去世嗰7位山友，都係因為意外或者病患而出事，所以就咁話佢哋準備唔充分導致發生事故，似乎唔太準確。

(網上圖片)

行山活動有風險

好鍾意 Kai Hin 喺 狗牙嶺文章有呢個附注：

「本路線涉及實際風險，即使經驗及準備充足仍有出意外的可能，請三思而後行」

好多人會叫我哋呢啲鍾意寫文章嘅，就唔好介紹狗牙嶺呢啲危險路線!

不過我一直認為，路線係死，人係生。如果你裝備上、體能上，以至心態上都唔做好準備，就算你行家樂徑都一樣危險!

事實上，Kai Hin 講中咗行山活動一個重點，就係任何戶外活動都危險性。無論你嘅準備幾充分都好，都仍然有出現意外嘅可能。

我咁講，當然唔係叫大家出發前，同屋企人交待後事咁嚴重，只係希望，大家要有危機意識。面對意外，千祈唔好心存僥倖。畢竟，我哋都要向其他人負責。

更多：
Fitz Facebook 專頁
[秋冬限定] 漁護署紅葉情報 (附9個賞紅葉勝地)
5條行山群組的月經問題 (附實用答案)
Fitz Hiking 行山