圖: Google Map

香港01》報道,現時經營扶輪公園「大帽山茶水亭」嘅蓮姐,將於三月底租約期滿,漁護署已選定新嘅中標者,蓮姐要搬出經營多年嘅茶水亭。不過,署方今次「特事特辦」,開放長年丟空嘅大帽山郊野公園遊客中心側嘅茶水亭,如果蓮姐順利中標,就可以搬上去繼續服務山友。

扶輪公園茶水亭 (綠圈),行上遊客中心要200米。
紅色虛線係遊客中心行落巴士站嘅小路。

新舖距離200米

暫時消息話,蓮姐嘅新舖位於「大帽山郊野公園遊客中心」,即係毅行者嘅8號檢查站。由原本嘅茶水亭行上去,雖然只有200米,不過條路幾斜,向上行要成5分鐘。而入面向公眾開放嘅遊客中心有展覽廳,特首林鄭早前上大帽山亦有參觀 (見下圖),外面仲有幾個停車位及公廁。

圖: 政府新聞處

紅剪咀係計劃開設茶水亭位置

最好嘅地方,如果由大帽山山頂行落嚟,就可以行少200米去到補給點。而遊客中心側邊,有小路行去巴士站,算係較為方便。

據了解,舊嘅茶水亭因為蓮姐經營咗廿幾年,所以供水、供電等設備都曾提升過。新嘅茶水亭設施有無咁好呢? 暫時未知。


不過對於唔少人嚟講,呢個新舖位點都係麻麻地:

  1. 店舖出面地方較舊舖侷束,
  2. 遊客中心應該幾多蚊
  3. 較為隱秘,一般人未必會留意。而且夜晚都幾黑幾靜
  4. 除非有大型活動,否則遊客中心夜晚會閉車閘,蓮姐要晚上開舖提供補給,可能要諗諗辦法

漁護署話,扶輪公園嘅茶水亭於四月開始有新經營者,到時一個地方有兩個茶水亭,唔知大家會幫襯邊檔呢?

特首去大帽山視察民情,蓮姐唔知有咩同佢講呢?  (政府圖片)

資料: 香港01


文章為作者意見,不代表Fitz立場。

歡迎投稿: https://fitz.hk/contribute/

廣告
朱溫
生於亂世,有種責任。這個責任就是做好自己,感染別人。鍛練好身體,才能裝備自己,迎接亂世。