少年你太輕狂了_f我山雞細個嘅時候都輕狂過:喺大學宿舍打足36圈麻雀連考試都甩底;飲醉酒坐地鐵坐去到地鐵車廠;自以為失戀大晒,一條友粒聲唔出走咗返大陸玩咗成個月,阿媽差啲登尋人啟事……

我嘅私人嘢大家未必有興趣知,講返行山啦。最癲嗰次,就係中學放暑假,同另一個同學,兩條友膽粗粗上鳳凰山頂露營。大家各自孭住十幾廿磅背囊(完全係Full Gear,即係有晒糧水、帳幕、Cook Set),仲要唔識路由昂坪上。喺三十幾度烈日之下,未行到一半,我眼前一黑,差啲成人碌落山……

自此之後,有人話我細膽,有人話我懦夫。總之行山嘅嘢,我幾時都堅持要安全行先。特別喺呢排烈火當空,上到山萬一有咩事真係搵命搏架。

好似早兩日報紙話,剩係一個星期日都有五宗行山中暑求助個宗。大家真係咪睇少呢個毒辣嘅太陽呀!

蚺蛇尖為香港三尖之首,一啲都唔嘢小。
蚺蛇尖為香港三尖之首,一啲都唔嘢小。

講咁多,其實都係想講一件事。星期五放工前,有幾位90後同事一時興起,話要行蚺蛇尖。佢哋雖然平時都有打下籃球,但行山經驗極淺。結果佢哋一行九位男女,有啲孭個斜孭袋,有兩位仲著住牛仔褲(我都係睇返佢哋facebook嘅相),就咁由北潭凹剷上山。


佢哋最後好彩都安全返到屋企(上唔上到山頂我唔係太在乎)。不過據講,中途有人熱到頭暈,有人抽筋,有人行到嘔……衰啲講,我覺得對佢哋係件好事,至少畀到佢哋一個深刻嘅教訓。

弊就弊在行完山之後,佢哋九個同事,有五位第二日返工要請Sick Leave,一時之間啲嘢邊個做喎……

更多:
心肌梗塞 + 中暑 點算好呢?
[落山難?] 落山4項基本要訣
[上山容易] 婆仔上樓級大法
山雞其他文章
Fitz Hiking 行山

Advertisements
分享
山雞
十歲登上魔鬼山,二十歲游走大帽大東鳳凰釣魚翁大刀屻。志願有二:生個仔要叫阿山;登上喜馬拉雅山,掛上真普選直幡。