網上圖片

話說荃灣近郊區某私人範圍放咗一隻象形裝飾,假象曾經喺市區展覽,後來展覽完咗之後暫放喺而家位置,位置雖然唔喺主流行山路線之內,但好容易到達。有山友偶然發現呢隻假象,覺得特別,於是將打卡照片放上 Facebook,然後經 YouTuber 清楚講解路線和推介打卡,唔駛三星期假象位置就曝光,山友仲開咗幾條山路入去,焗住物主要安排轉移位置。而路線因為途經養蜂範圍,要喺蜂箱之間經過,有一定危險性。

近期「山野‧新聞庫」都有講起野外僭建既問題,有一類僭建係有人專登整出黎,可能出於私心,例如起出嚟俾自己玩、自己用,又或者出於大愛,覺得整咗可以俾大家使用,但係亂咁建設就未必係好事 (例如險線加繩),如果僭建整既技術有問題、用錯材料、缺乏保養之類,可能會害死街坊都唔定,而用嘅地方又係公家嘢,未經相關部門或者負責人批准而用咗又唔合理,所以唔好立亂喺郊野地方亂起嘢。

網上圖片
呢件事帶出幾個問題:
  1. 據山友情報,那個位置係私人範圍,胡亂進入人地既地方搞搞震當然唔好啦,正如有人無啦啦走入閣下屋企,咁又有乜感受?!;
  2. 隻象有物主架,未問過物主就搞人地既嘢,又爬埋上去,仲有人加繩,其實問過物主未?!整爛咗又點計?!;
  3. 去假象既路會途經養蜂範圍,有潛在危險,又會影響蜜蜂日常生活;
  4. 隻假象唔係幾受力,因為本來只係展覽用途,都冇預有人爬上去。由於有唔少山友曾經爬過上去,已經有破爛跡象,會發生危險,到時受傷跌死唔好入物主數;
  5. 部份山友本來都唔想公開位置,所以只會 pm 回答提問,但 pm 只係自欺欺人既行為,因為對方未必守到秘密,一樣可以爆出去,只係直接爆同間接爆既分別;
  6. 至於走去打卡既人心態係點,如果只係記錄自己去過某地方到此一遊,其實唔駛下下放上公開群組,私下儲起相片就可以,而放上群組咪又係呃 like 刷存在感,咁為咗呃 like 可以去到幾盡?! 如果去到景點,都可以喺身邊影相就得,保持原貌,而唔駛爬上去搞壞架,又甚至有人喺附近寫「某人到此一遊」,鬼識某人係阿水咩?!
  7. 有唔少 Youtuber 和山友圖文並茂詳細講解大象路線,咁樣公開私人地方,除咗只係呃一千幾百點擊之外,咁對果班友有乜好處?! 咁只會影響物主同埋私人範圍;
  8. 公開所謂既秘景,有人覺得係好事,可以同人「分享」秘密,原理上係冇錯,但所謂既「分享」如果係會為別人、環境帶來傷害,咁既「分享」就係一件壞事,當然又有人會話「如果對方愛惜既,咁分享又何妨」,可惜冇人可以確保對方做到要求,而放上 Facebook 群組、Youtube 之類既地方,呢種係無差別既分享,係人都睇到,更難確保網友係咪全都係愛護郊野之人,只係好心做壞事。
網上圖片

所謂既秘景,實在唔方便喺網上公開,以而家既行山風氣,只要係稍為有特色既地方,都好容易俾一大堆人玩爛,今次既假象就係一個好例子。據聞大象近日會運走,大家玩爛景點喇,又麻煩到物主,打卡果班可能仲會諗「好彩我一早去咗咋」,但喺其他人既角度,只係將快樂建築喺人地同環境之上。

最後,都多謝今次提供資料既山友,大家都好熱心處理呢次事件,都證明香港仲有唔少愛山之人,希望果堆自私自利兼掛住打卡呃 like 既山友學嘢啦。


編按: 假象於2月25日已被運走

網上圖片

按: 標題為編者所擬

大家好,我係Admin小薯仔,今日題目由我負責。

相關事件發生咗一段時間,但近一個月不斷發酵,又有唔少網友提供相關資料,都可以拎出黎研究下。

話說荃灣近郊區某私人範圍放咗一隻象形裝飾,假象曾經喺市區展覽,後來展覽完咗之後暫放喺而家位置,…

Posted by The hiking Database 山野‧新聞庫 on Thursday, February 25, 2021

原文載於 The hiking Database 山野‧新聞庫


文章為作者意見,不代表Fitz立場。
歡迎投稿: http://fitz.hk/contribute/
首頁 > 運動 Sports > 行山 Hiking > [山野.新聞庫] 假象打卡行為自私自利