「縱走能高安東軍」景色

台灣中部有名15歲少年,唔理屋企人反對,決意用5日完成高3000米嘅登山旅程。不過,佢完全無視基本登山安全守規,身上零裝備,結果當晚警方接到家人求救,最後將佢安全送落山。

「縱走能高安東軍」6日行程

按圖放大

少年呢次打算行嘅路線,係台灣中央山脈嘅「縱走能高安東軍」— 路線由南投縣屯原登山口起步,一般需時六日,經過五座百岳,最後至萬大南溪的溪床完結,總里數大約50公里。當中主菜就係高逾3000米嘅能高山同安東軍山。

除咗路程長同山勢險要,山區天氣仲係變幻莫測。呢幾日台灣氣溫驟降,高山只得攝氏6度,上山真係要做足準備。

少年裝備「似去打籃球」

不過,呢位15歲少年就完全唔理屋企人勸阻,夾硬拎住個手提包行上山。依照佢姑媽喺行山群組發出嘅尋人啟事,佢當日嘅裝備「似足去打籃球」:

  • 5個杯麵
  • 幾件衣服
  • 一個輕便背囊

少年無睡袋無帳幕,更加無煮食用品,一個走上高山,真係搵命博?

家人即晚未能聯絡少年後,隨即網上發帖求救,救援人員終於深夜喺山上搵到佢嘅蹤跡,仲帶返佢落山。

天池山莊

父母縱容被鬧爆

事後發現,當事人只係上網睇過介紹文章就決定上山,之前無任何登山經驗。網上唔少評論都認為,少年父母要負最大責任,因為佢哋既無灌輸生活常識,亦無盡力阻止少年嘅瘋狂行為;萬一有救援人員因此受傷,更係累人累物。有人甚至要求,當局處罰少年嘅父母。

資料: 三立新聞


文章為作者意見,不代表Fitz立場。
歡迎投稿: http://fitz.hk/contribute/
首頁 > 運動 Sports > 行山 Hiking > 帶5個杯麵挑戰百岳 台灣少年險送命