獅子山 圖: 網上圖片

武漢肺炎威脅之下,跑季消失,但山季延長,每個周末嘅行山人潮更係大爆發。行山固然要做足準備,唔好揸車去行山,上到山唔好亂拋垃圾之外,疫症時期嘅行山活動都有好多嘢值得大家留意。

1. 人少啲安全啲

香港幾個感染嘅「群體」都係源自出席十幾廿人嘅群組活動。單拖行山當然唔鼓勵,但如果結伴同行,都係搵三兩知已,唔好一大班人嘞。

2. 屋企後山係好地方

每個禮拜都見到城門水塘、龍脊、烏蛟騰等地方人滿為患,其實行山都係為咗舒展筋骨,呼吸新鮮空氣,無需要同人逼。況且要搭車要搭船先去嗰啲著名行山徑,亦將自己暴露喺危險之中。既然香港區區有山行,呢個時候更應該發掘下自己住嗰區嘅山徑。

3. 擇時而行

大家明知星期六日嘅十一點打後都係行山高峰期,咁真係有心行,唔該早少少出發。有豐富行山經驗嘅朋友,亦可以選擇行夜山,但要注意帶電筒以及計劃好路線。

4. 選擇較闊路面

呢個疫症同人親近時較具傳染力,所以規劃路線盡量揀啲路面闊落啲,唔使人逼人要排隊上山嗰啲。例如龍脊、大東山、獅子山,梯級較多,較容易引起大塞車嘅山徑,就盡量少行。

5. 與人保持距離


平時行盡量同唔認識嘅人保持距1米 (約3呎) 距離,做運動時要求更多,最好有2米 (約6呎) 距離。

6. 帶備消毒用品及口罩

始終係瘟疫蔓延時,遇到難以避開人潮時,戴返個口罩,觸摸公共物件後,就最好用酒精清潔雙手。


文章為作者意見,不代表Fitz立場。

歡迎投稿: https://fitz.hk/contribute/

廣告
朱溫
生於亂世,有種責任。這個責任就是做好自己,感染別人。鍛練好身體,才能裝備自己,迎接亂世。