圖: Oxfam Trailwalker Hong Kong

朋友圈流傳多件毅行悲慘事件,筆者唔係想揭人瘡疤,只係想大家唔好犯上同樣錯誤!

1. 錯誤衣著

某年,某歌星代表某電台參加毅行,一身籃球衫褲起步,行到金山,大脾被及膝嘅籃球褲磨至出血。結果,到急救站問義工借較剪,剪短條褲完成活動。

教訓: 衫褲鞋襪要一早預備好,仲應該係合適嘅行山裝備。而每件裝備都要喺訓練時著過試過。記往「舊好過新」,新嘢留番影相用啦。

2. 必備風褸

比賽當日市區日間氣溫達28度,有朋友行到城門水塘,覺得天氣熱,就擺低件風褸畀支援隊。結果上到大帽山太陽落山,氣溫驟降,加上山頂風大。呢位朋友最後搵個垃圾膠袋包住自己,先唔會凍親。

教訓: 毅行者於11月舉行,呢個季節,風褸喺夜晚時份係必要裝備,真係唔好立亂放低。

3. 操練過度

有隊伍將目標完成間定為18小時,每星期兩課,每課無50公里都30公里,到舉行毅行前一星期都仲操緊。結果,佢哋由第三段開始已有隊員退出,到終點只有一位隊員完成。

教訓: 操練過度就係呢啲,記住休息係訓練嘅一部份。

圖: Oxfam Trailwalker Hong Kong

4. 勿因小失大

A君第二段開始發現腳底有水泡,以為會無事,結果行到 CP4 已經行唔到。除鞋一睇,發覺鞋入面有粒石仔。

教訓: 覺得唔妥即時停低 check check。上面呢個 case,只要肯花30秒除鞋倒番粒石仔,就會出事。

5. 能量食品勿亂試

有人喺毅行活動入面,第一次食 energy gel,諗住可以爆得勁啲。結果,佢個肚就爆嘞,食咗包 gel 之後,由獅子山屙到大帽山。當中,仲要眾目睽睽之下,喺針山山頂解決……

教訓: 嘢唔可以亂食。其實 engery gel 呢一類食品,之前最好試下先,特別係毅行當日運動量咁大,腸胃功能會下降。

圖: Oxfam Trailwalker Hong Kong

6. 重要裝備要跟身

2010年,天文台預測間中有雨。有人夜晚7點幾上到牛耳石山,突然狂風大雨。一行四人竟然連便利雨衣都無一件。全身濕晒之餘,佢仲係要著對跑鞋落碎石路,結果又係剪帶收場。

教訓: 留意天氣,做足準備。裝備固然會增加負重,但稍微增加負重,係咪真係影響咁大? 其實呢個係心理作用居多。反而,如果為求減重而放棄某些重要裝備,最後嚴重影響表現,就一啲都唔值得。

7. 活動前要有足夠休息

有人為咗參加毅行,就要問公司攞大假。而起步前一晚,為咗要放假就要做到朝早六點,然後匆匆入北潭涌起步。到當晚深夜,行到第四段已開始嗌眼瞓,去到茅坪直頭話要瞌5分鐘、10分鐘。到 CP4 基維爾,見到尼龍床一句唔該就衝埋去瞓足大半粒鐘,要其餘三個隊友又鬧又推,佢先可以慢慢繼續行。到城門,其餘三名隊友計過條數,發現唔衝就唔可以48小時內完成。於是就要求呢位隊友剪帶,其餘三位衝向終點。最後,三位隊友啱啱47個鐘完成活動。

教訓: 毅行者要求參加者48小時內完成活動,咁唔該預自己有足夠體力。上面 case,因為自己問題而搞到其餘三名隊友受苦……唔怪得有人話,參加毅行,一係就多咗朋友,一係就多咗敵人。

CP3可說係剪帶勝地。
CP3可說係剪帶勝地 圖: Oxfam Trailwalker Hong Kong

8. 認識你的隊友

有四個人之前素未謀面,基於某些原因在九月左右組成一隊,練過兩三課左右。到正式毅行,其餘三位隊員覺得隊員A行得太慢,言語單打之餘,仲唔會等埋佢。最後,呢位隊員A抵受唔到壓力,喺 CP3 退出。而其他嗰三位懶係勁嘅隊員,雖然叫做完成活動,但係咪又係拎唔到 Full Cert。

教訓: 樂施會講扶助弱勢,所以毅行者其中一個重要嘅精神,就係要關顧隊友。而每次過檢查站,都一定要等齊所有未剪帶嘅隊員。上面呢幾位懶係勁嘅朋友固然要譴責,不過亦要提醒大家,錯點鴛鴦喺毅行者時有出現 (情況大多係有人中籤,但搵唔夠隊員,於是就搵到啲唔知點嚟嘅隊員)。就算大家都係行山老手,都唔該要一齊練多幾課。唔一定係鍛鍊咩技術,反而係要互相了解,增進感情。

Fitz為樂施毅行者2019媒體合作伙伴

樂施毅行者網站
樂施毅行者 Facebook 專頁

Fitz連結: https://fitz.hk/?p=126062

廣告